Fýtboldan Eýropa chempıonaty: Nıderlandy Chehııaǵa jol berdi
NUR-SULTAN. QazAqparat - Fýtboldan Eýropa chempıonatynyń shırek fınalyna joldama alǵan úshinshi qurama anyqtaldy, dep habarlaıdy QazAqparat tilshisi.
Dúbirli dodanyń 1/8 fınalyndaǵy ekinshi kezdesýde Nıderlandy men Chehııa jasyl alańǵa shyqty.
Eki qurama buǵan deıin 11 márte kezdesti. Onyń 5-de Chehııa basym túsip, 3-de Nıderlandynyń mereıi ústem boldy, qalǵanynda teń nátıje tirkeldi.
Aıta keterligi, sońǵy ret Nıderlandy atalǵan qarsylasyn 2005 jyldyń 18 qazanynda álem chempıonatyna irikteý kezeńinde jeńgen bolatyn. Sodan beri eki kezdesýde chehııalyqtar basym tústi.
Búgingi kezdesýde qos qurama terezesi teń deńgeıde oıyn kórsetti. Ekinshi kezeńniń 55-mınýtynda nıderlandylyq Matteıs de Lıgt qyzyl qaǵaz alyp, alańnan qýyldy. Budan keıin nıderlandylyq fýtbolshylar tizgindi qarsylastaryna berip qoıǵandaı kórindi.
Nátıjesinde chehııalyqtar qatarynan Tomash Golesh 68-mınýtta esep ashsa, 80-mınýtta Patrık Chık esepti ústemeleı tústi.
Oıynda Chehııa qarsylasyn 2:0 esebimen jeńdi. Endi olar 3 shildede shırek fınalda Ázerbaıjan astanasy Baký qalasyndaǵy Olımpıada stadıonynda sheberlik baıqasady.
Eske salsaq, budan buryn Danııa Ýelsti 4:0 esebimen jeńip, Italııa Aýstrııany overtaımda 2:1 esebimen tize búktirdi.
Aıta ketsek, jarystyń 1/8 fınalynda endi búgin, 27 maýsymda Belgııa men Portýgalııa quramalary kezdesedi. Al 28 maýsymda Horvatııa men Ispanııa, Frantsııa men Shveıtsarııa, 29 maýsymda Anglııa men Germanııa, Shvetsııa men Ýkraına jasyl alańǵa shyǵady.
FOTO/ sport.ua
