Fýtboldan Eýropa chempıonaty: Qazaqstan jastary Shotlandııamen teń tústi
NUR-SULTAN. QazAqparat - Elimizdiń 21 jasqa deıingi jastar quramasy Eýropa chempıonaty irikteý týrnırinde óz alańynda Shotlandııamen kezdesti, dep habarlaıdy QazAqparat tilshisi.
Kezdesý barysynda qos quramanyń belsendiligi ańǵarylyp turdy. Degenmen esepti shotlandııalyq fýtbolshylar ashty. Olardyń qatarynan 25-mınýtta Ros Graham mergendik tanytty.
Ekinshi kezeńde shotlandııalyq taǵy bir oıynshy Tom Kleıton óz quramasynyń basymdyǵyn arttyra tústi. Al 71-mınýtta Erkebulan Seıdahmet penaltıden esep aıyrmasyn qysqartsa, 95-mınýtta Abylaıhan Jumabek tarazy basyn teńestirdi.
Osylaısha Qazaqstan jastary Shotlandııamen 2:2 esebimen teń tústi. Nátıjesinde irikteý kezeńindegi alǵashqy upaıyna qol jetkizdi.
Aıta ketsek, irikteý týrnırinde Qazaqstan jastar quramasy I tobynda Belgııa, Danııa, Shotlandııa jáne Túrkııamen synǵa túsýde. Ázirge alty oıynnan keıin bir upaıǵa ıe boldy. Týrnır kestesinde kósh sońynda tur.
Endi elimizdiń jastar quramasy 4 sáýirde syrt alańda Danııamen sheberlik baıqassa, 10 maýsymda syrt alańda Túrkııamen kezdesedi.
Eske salsaq, budan buryn Qazaqstan jastary Qyrǵyzstan olıımpıadalyq quramasynan 2:0 esebimen basym tústi.
