Fýtboldan Eýropa chempıonaty: Italııa Shveıtsarııany oısyrata jeńdi
NUR-SULTAN. QazAqparat - Fýtboldan Eýropa chempıonatynyń fınaldyq satysyndaǵy toptyq kezeńi ekinshi týrynda Italııa men Shveıtsarııa quramalary kezdesti, dep habarlaıdy QazAqparat tilshisi.
Eske salsaq, atalǵan eki qurama A tobynda synǵa túsedi. Qarsylastary – Ýels jáne Túrkııa.
Alǵashqy týrda Italııa Túrkııadan 0:3 esebimen basym tússe, Shveıtsarııa Ýelspen 1:1 esebimen teń oınady.
Eki qurama buǵan deıin 58 márte kezdesken. Onyń 28-de Italııa jeńiske jetip, 8-de Shveıtsarııanyń mereıi ústem bolsa, 22-de teń nátıje tirkeldi.
Búgingi kezdesýde ıtalııalyq fýtbolshylardyń basymdyǵy ańǵarylyp turdy. Nátıjesinde Manýel Lokatellı 26, 52-mınýttarda mergendik tanytty.
Budan keıin shveıtsarııalyq qurama alǵa qaraı umtyldy. Dese de olardyń gol soǵýyna ıtalııalyqtar múmkindik bere qoıǵan joq. Esesine 89-mınýtta Chıro Immobıle qorytyndy esepte belgiledi.
Aıta keterligi, eki quramanyń sońǵy úsh oıynynda teń nátıje tirkelgen edi. Italııa quramasy sol sátsizdikter serııasyn toqtatty.
Osylaısha qarsylasynan 3:0 esebimen basym tústi.
Atalǵan toptaǵy úshinshi týr oıyndary 20 maýsymda ótkiziledi. Bul kúni Shveıtsarııa men Túrkııa, Ýels pen Italııa sheberlik baıqasady.
