Fýtboldan Eýropa chempıonaty: Italııa quramasy fınalǵa shyqty
NUR-SULTAN. QazAqparat - Fýtboldan Eýropa chempıonatynyń fınalyna Italııa quramasy alǵashqy joldamany aldy, dep habarlaıdy QazAqparat tilshisi.
Eki qurama buǵan deıin 38 márte kezdesti. Onyń 11-de ıtalııalyqtar jeńiske jetip, 12-de ıspandyqtar basym túsip, qalǵanynda teń nátıje tirkeldi.
Aıta keterligi, budan buryn Italııa tórt márte jartylaı fınalǵa shyqqan. Nátıjesinde 1968 jyly chempıon atansa, 1988 jyly «qolaǵa» qol sozdy. Al 2000, 2012 jyldary kúmis júldeger atandy.
Ispanııalyq qurama qurlyqtyq dodada 1964, 2008, 2012 jyldary úsh márte altyn medal aldy.
Búgingi kezdesýde qos qurama terezesi teń deńgeıde oıyn kórsetti. Nátıjesinde oıynnyń negizgi kezeńinde 1:1 esebi tirkeldi. Italııa sapynan Federıko Keza 60-mınýtta esep ashsa, 80-mınýtta ıspanııalyq Alvaro Morata tarazy basyn teńestirdi. Osylaısha oıyn overtaımǵa ulasty.
Overtaımda da jeńimpaz anyqtalǵan joq. Penaltı tebýde Italııa joly bolyp, fınalǵa joldama aldy.
Endi búgin, 7 shildede jartylaı fınalda Anglııa men Danııa quramalary sheberlik baıqasady.
Fınal 11 shildede Anglııanyń London qalasyndaǵy «Ýemblı» stadıonynda ótkiziledi.
Eske salaıyq, qurlyqtyq doda on altynshy márte ótkizilip otyr. Kári qurlyqta 1960 jyly alǵashqy Eýropa birinshiligi uıymdastyryldy. Oıyndar dúbirli doda tarıhynda tuńǵysh ret Eýropanyń 10 memleketinde ornalasqan 11 stadıonda ótkizilýde. Bul dúbirli dodanyń 60 jyldyq mereıtoıyna oraı uıymdastyrylǵan. Bıylǵy birinshilikte barlyǵy 24 qurama synǵa tústi.
