Fýtboldan Eýropa chempıonaty: Italııa Avstrııany overtaımda jeńdi
NUR-SULTAN. QazAqparat - Fýtboldan Eýropa chempıonatynyń shırek fınalyna joldama alǵan taǵy bir qurama anyqtaldy, dep habarlaıdy QazAqparat tilshisi.
Dúbirli dodanyń 1/8 fınalyndaǵy ekinshi kezdesýde Italııa men Avstrııa jasyl alańǵa shyqty.
Eki qurama buǵan deıin 38 márte kezdesti. Onyń 17-sinde Italııa basym túsip, 13-inde Avstrııanyń mereıi ústem boldy, qalǵanynda teń nátıje tirkeldi. Aıta keterligi, sońǵy ret Avstrııa atalǵan qarsylasyn 1960 jyldyń 10 jeltoqsanynda ótken joldastyq kezdesýde jeńgen bolatyn. Sodan beri 13 kezdesýdiń 10-ynda avstrııalyqtar qarsylasyna ese jiberip, qalǵanynda atalǵan quramalar teń nátıjege qanaǵat bildirdi.
Búgingi kezdesýde eki quramanyń da jeńiske jetýge múmkindigi zor boldy. Dese de kóptegen sátterde oıynshylar kózdegen nysanadan múlt ketti.
Al 67-mınýtta avstrııalyq shabýylshy Marko Arnaýtovıch qarsylastar qaqpashysyn qapy qaldyrǵan edi. Degenmen tóreshi VAR júıesine súıenip, ony oıynnan tys qaldy dep eseptep, goldy sanaǵan joq.
Negizgi kezeńde 0:0 esebi tirkelip, oıyn overtaımǵa ulasty. Overtaımnyń 95-mınýtynda Federıko Kezo qaqpany dál kózdedi. Al Matteo Pessına 105-mınýtta esepti ústemeledi. Oǵan avstrııalyq Sasha Kalaıdjıch 114-mınýtta bir golmen jaýap qaıyrǵan edi.
Kezdesýde Italııa qarsylasyn 2:1 esebimen jeńip, jarystyń shırek fınalyna ótti.
Aıta ketsek, 26 maýsymda 1/8 fınalda bir oıyn ótkizildi. Danııa Ýelsti 4:0 esebimen oısyrata jeńip, shırek fınalǵa joldama aldy.
Endi jarystyń 1/8 fınalynda 27 maýsymda Nıderlandy men Chehııa, Belgııa men Portýgalııa kezdesedi. Al 28 maýsymda Horvatııa men Ispanııa, Frantsııa men Shveıtsarııa, 29 maýsymda Anglııa men Germanııa, Shvetsııa men Ýkraına jasyl alańǵa shyǵady.
