Fýtboldan Eýropa chempıonaty: Frantsııa Germanııany jeńdi
NUR-SULTAN. QazAqparat - Fýtboldan Eýropa chempıonatynyń fınaldyq satysyndaǵy toptyq kezeńde Frantsııa jáne Germanııa quramalary kezdesti, dep habarlaıdy QazAqparat tilshisi.
Jankúıerler olardy álemdegi úzdikter qataryna qosady. Sondyqtan qurlyqtyq doda barysynda eki tájirıbeli quramanyń kezdesýin kópshilik asyǵa kútkeni anyq.
Eki qurama buǵan deıin 16 márte kezdesken. Onyń 8-de frantsýzdar jeńiske jetip, 4-de nemister basym tússe, qalǵanynda teń nátıje tirkeldi.
Oıyn alma-kezek shabýylmen órbidi. Qos qurama bir-biriniń osal tusyn tabýǵa tyrysty. Degenmen tablodaǵy esep ózgerissiz qaldy.
Nátıjesinde Frantsııa Germanııadan 1:0 esebimen basym tústi.
Dese de birinshi kezeńde nemis fýtbolshysy Mats Hýmmels óziniń qaqpasyna gol soǵyp aldy. Budan keıin qos qarsylastyń esepti ózgertetin birneshe múmkindigi bolǵan edi.
Eske salsaq, atalǵan eki komanda F tobynda synǵa túsedi. Qarsylastary – Portýgalııa jáne Vengrııa.
Osy topta budan buryn Portýgalııa Vengrııadan 3:0 esebimen basym túsken bolatyn. Endi F tobyndaǵy kelesi týr 19 maýsym kúni bolady. Bul kúni Portýgalııa men Germanııa, Vengrııa men Frantsııa quramalary kezdesedi.
Bıylǵy birinshilikte barlyǵy 24 qurama synǵa túsýde. Árbir toptan úzdik eki komanda men kórsetkishi joǵary tórt qurama jarysty jalǵastyrýǵa múmkindik alady.
Fýtboldan Eýropa chempıonaty 11 maýsymda bastaldy, ol 11 shildede máresine jetedi.
