Fýtboldan Eýropa chempıonaty: Fınaldy qaıdan kórýge bolady
NUR-SULTAN. QazAqparat - Búgin, 11 shildede fýtboldan Eýropa chempıonatynyń fınaly ótedi, dep habarlaıdy QazAqparat tilshisi.
Fınal Anglııa astanasy London qalasynda «Ýemblı» stadıonynda 11 shildeden 12 shildege qaraǵan túni elorda ýaqytymen 00.50-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.
Eki qurama buǵan deıin 27 márte kezdesti. Onyń 10-da Italııa jeńiske jetip, 8-de Anglııa basym tússe, qalǵanynda teń nátıje tirkeldi.
Sońǵy úsh oıynda Anglııa atalǵan qarsylasynyń osal tusyn taba almaı keledi. Úsh kezdesýdiń ekeýinde teń tússe, bireýinde qarsylasyna ese jiberdi.
Aıta keterligi, budan buryn Italııa tórt márte jartylaı fınalǵa shyqqan. Nátıjesinde 1968 jyly chempıon atansa, 1988 jyly qolaǵa qol sozdy. Al 2000, 2012 jyldary kúmis júldeger atandy.
Al aǵylshyndar 1968, 1996 jyldary qurlyqtyq dodanyń jartylaı fınalynda oıyn kórsetti. Ekeýinde de qarsylastaryna ese jiberip, qola júldeni qanaǵat tutqan edi.
Eske salsaq, buǵan deıin 10 qurama chempıondyq ataqqa qol jetkizdi. Olardyń qatarynda Germanııa men Ispanııa -3, Frantsııa - 2, KSRO, Italııa, Portýgalııa, Chehoslovakııa, Nıderlandy, Danııa men Grekııa bir-birden jeńimpaz tuǵyrynan kórindi.
2024 jyly qurlyqtyq doda Germanııada ótkiziledi. Ol 14 aqpan men 14 shilde aralyǵynda bolady.
Eske salaıyq, bul báseke on altynshy márte ótkizilip otyr. Kári qurlyqta 1960 jyly alǵashqy Eýropa birinshiligi uıymdastyryldy. Oıyndar tuńǵysh ret Eýropanyń 10 memleketinde ornalasqan 11 stadıonda ótkizilýde. Bul dúbirli dodanyń 60 jyldyq mereıtoıyna oraı uıymdastyrylǵan. Bıylǵy birinshilikte barlyǵy 24 qurama synǵa tústi.