Fýtboldan Eýropa chempıonaty: Danııa Ýelsti jeńip, shırek fınalǵa shyqty
NUR-SULTAN. QazAqparat - Fýtboldan Eýropa chempıonaty 1/8 fınalyndaǵy alǵashqy oıyn ótkizildi, dep habarlaıdy QazAqparat tilshisi.
Jarystyń atalǵan satysyndaǵy birinshi kezdesýde Ýels pen Danııa quramalary sheberlik baıqasty.
Eske salsaq, buǵan deıin eki qurama 10 márte kezdesti. Onyń 4-de ýelstik fýtbolshylar basym tússe, qalǵanynda danııalyq quramanyń mereıi ústem boldy. Keıingi eki oıynda danııalyqtar jeńiske jetken.
Ýels quramasy sol sátsizdikter serııasyna toqtaý sala alǵan joq. Bul oıynda da qarsylasyna ese jiberip qoıdy. Oıyn barysynda Kasper Dolberg 27, 48-mınýttarda mergendigimen kózge túsip, óz quramasynyń basymdyǵyn arttyrdy. Odan keıin otandastary Ioakım Mehle 88, Martın Breıtýeıt 94-mınýttarda qarsylastar qaqpasynan sańylaý tapty.
Osylaısha Danııa qarsylasyn 4:0 esebimen jeńip, shırek fınalǵa joldama aldy.
Aıta ketsek, jarystyń 1/8 fınalynda Italııa men Aýstrııa kezdesedi. Al 27 maýsymda Nıderlandy men Chehııa, Belgııa men Portýgalııa, 28 maýsymda Horvatııa men Ispanııa, Frantsııa men Shveıtsarııa, 29 maýsymda Anglııa men Germanııa, Shvetsııa men Ýkraına jasyl alańǵa shyǵady.
