Fýtboldan Eýropa chempıonaty: Danııa 29 jylda alǵash ret 1/2 fınalǵa shyqty
NUR-SULTAN. QazAqparat - Búgin Danııa quramasy fýtboldan Eýropa chempıonatynyń jartylaı fınalyna joldama aldy, dep habarlaıdy QazAqparat tilshisi.
Eki qurama buǵan deıin 11 márte kezdesti. Onyń 3-de Chehııa basym túsip, 2-de Danııa jeńse, qalǵanynda teń esep tirkeldi.
Sońǵy ret Chehııa Danııany 2004 jyldyń 27 maýsymynda Eýropa chempıonatynyń 1/4 fınalynda 3:0 esebimen jeńgen bolatyn. Sodan bergi alty kezdesýdiń beseýinde teń esep tirkelip, bireýinde Danııa jeńiske jetti.
Búgingi kezdesýde ekeýiniń de jeńiske jetý múmkindigi birdeı boldy. Degenmen alǵashqy eki goldy danııalyqtar soqty. Oıynnyń 5-mınýtynda Tomas Dıleını mergendik tanytsa, 42-mınýtta Kasper Dolberg esepti ústemeleı tústi.
Ekinshi kezeń bastalǵannan chehtar alǵa qaraı umtyldy. Olardyń qatarynan Patrık Şık 49-mınýtta esep aıyrmasyn qysqartty. Ol – fýtbolshynyń qurlyqtyq doda barysynda soqqan besinshi goly. Surmergender kóshinde osylaısha portýgaldyq Krıshtıaný Ronaldýmen teńesti.
Nátıjesinde Danııa qarsylasyn 2:1 esebimen jeńip, jartylaı fınalǵa joldama aldy.
Eske salsaq, budan buryn qurlyqtyq dodada 1992 jyly chempıondyq ataqqa qol jetkizgen edi. Sodan bergi ýaqytta jartylaı fınalǵa shyqqan emes. Osylaısha 29 jyl burynǵy jetistigin qaıtalaýǵa jaqyndap keledi.
Jartylaı fınal oıyndary 6 jáne 7 shilde kúnderi ótedi. Aldymen 6 shildede Italııa men Ispanııa sheberlik baıqasady. Al 7 shildede Ýkraına men Anglııa jubynyń jeńimpazymen kezdesedi.
Fınal 11 shildede Anglııa astanasy London qalasyndaǵy «Ýemblı» stadıonynda ótedi.
