Fýtboldan Eýropa chempıonaty: Búgingi oıyndy qaıdan kórýge bolady
NUR-SULTAN. QazAqparat - Búgin fýtboldan Eýropa chempıonatynyń alǵashqy jartylaı fınalynda Anglııa men Danııa quramalary kezdesedi, dep habarlaıdy QazAqparat tilshisi.
Eki qurama buǵan deıin 21 márte kezdesti. Onyń 12-de aǵylshyndar jeńiske jetip, 4-de danııalyqtar basym tússe, qalǵanynda teń nátıje tirkeldi.
Aıta keterligi, sońǵy eki kezdesýde Anglııa atalǵan qarsylasyn jeńe almaı keledi. 2020/21 jylǵy Ulttar lıgasynda olar syrt alańda 0:0 esebimen teń tússe, óz alańynda 1:2 esebimen jol berip qoıdy.
Atalǵan match Anglııanyń London qalasyndaǵy «Ýemblı» stadıonynda ótkiziledi.
Oıynda nıderlandylyq Dannı Makkelı bas qazy qyzmetin atqarady. Oǵan otandastary Hessel Stegstra men ıAn de Vrıs kómekshilik jasaıdy. Qosalqy tóreshi - rýmynııalyq Ovıdıý Hatsegan.
Oıyn elorda ýaqytymen 23.50-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.
Eske salsaq, budan buryn jartylaı fınalda Italııa Ispanııany jeńip, fınalǵa joldama aldy.
Fınal 11 shildede «Ýemblı» stadıonynda ótkiziledi.
