Fýtboldan Eýropa chempıonaty: Búgingi oıyndardy qaıdan kórýge bolady
NUR-SULTAN. QazAqparat - Búgin fýtboldan Eýropa chempıonaty shırek fınalynda eki oıyn ótkiziledi, dep habarlaıdy QazAqparat tilshisi.
Shırek fınal oıyndary 2 jáne 3 shilde kúnderine belgilengen. Búgin – eki, erteń eki jup ózara sheberlik baıqasady.
Jarystyń atalǵan satysynda alǵashqy kezdesý Shveıtsarııa men Ispanııa quramalary arasynda bolady. Oıyn elorda ýaqytymen 21.50-de bastalyp, «Qazaqstan» men «Qazsport» telearnalarynan tikeleı efırde kórsetiledi.
Kezdesý Reseıdiń Sankt-Peterbýrg qalasyndaǵy «Gazprom-arena» stadıonynda ótkiziledi. Oıynda anglııalyq Maıkl Olıver bas qazy qyzmetin atqarady.
Eki qurama buǵan deıin 24 márte kezdesti. Onyń 18-de Ispanııa basym túsip, 1-de Shveıtsarııa jeńse, qalǵanynda teń esep tirkeldi. 2010 jyldyń 16 maýsymynda álem chempıonaty fınaldyq satysynda Shveıtsarııa atalǵan qarsylasynan 1:0 esebimen jeńilgen bolatyn.
Eske salsaq, jarystyń 1/8 fınalynda Ispanııa Horvatııany, Shveıtsarııa Frantsııany orta jolda qaldyryp ketti.
Búgingi taǵy bir kezdesýde Belgııa men Italııa quramalary jasyl alańǵa shyǵady. Oıyn elorda ýaqytymen 00.50-de bastalyp, «Qazaqstan» telearnasynan tikeleı efırde kórsetiledi.
Oıyn Germanııanyń Mıýnhen qalasyndaǵy «Alıants-arena» stadıonynda ótkizilip, onda slovenııalyq Slavko Vınchıch bas tóreshi qyzmetin atqarady.
Eki qurama buǵan deıin 22 márte kezdesti. Onyń 4-de Belgııa basym túsip, 14-de Italııa jeńse, qalǵanynda teń esep tirkeldi. Sońǵy ret Belgııa Italııany 2015 jyldyń 13 qarashasynda joldastyq kezdesýde 3:1 esebimen jeńgen bolatyn.
Sondaı-aq, jarystyń atalǵan satysynda 3 shildede Chehııa men Danııa, Ýkraına men Anglııa quramalary kezdesedi.
Aıta keteıik, 1/8 fınalda Belgııa Portýgalııany, Italııa Avstrııany orta jolda qaldyryp ketti.
