Fýtboldan «Elorda kóktemi» balalar týrnıri ótedi
ASTANA. QazAqparat - 23 sáýir kúni «Tarlan Arena» sport kesheninde 2008 jyly dúnıege kelgen jasóspirimder arasynda «Elorda kóktemi» balalar týrnıri ótkiziledi, dep habarlaıdy QazAqparat.
«Jarystyń basty uıymdastyrýshysy - «Astana» fýtbol klýby. Al týrnır Qazaqstan fýtboly kúnine arnaıy uıymdastyrylyp otyr. «Elorda kóktemi» týrnıri qalamyzdyń barlyq jasóspirimder fýtboly ókilderiniń basyn bir jerge toǵystyrady dep kútilýde. Týrnırde elorda fýtbol ortalyǵynyń komandalary, №8 sport mektebiniń jáne qalamyzdyń birneshe jekemenshik komandalary baq synaıdy»,- delingen «Astana» fýtbol klýbynyń baspasóz qyzmeti taratqan aqparatta.
Jarys jeńimpazdaryna dástúr boıynsha kýboktar men medaldar, Lego konstrýktorlary jáne «Astana» fýtbol klýbynyń estelik syılyqtary tabys etiledi.
«Astana» fýtbol klýbynyń atqarýshy dırektory Qaısar Bekenov, «Astana» fýtbol klýbynyń sport dırektory Aleksandr Konochkın, Jasóspirimder fýtbolyn damytý baǵdarlamasynyń basshysy, «Jeńis» fýtbol klýbynyń jáne Qazaqstan ulttyq quramasynyń eks-jartylaı qorǵaýshysy Kostantın Kotov, qazirgi Qazaqstan ulttyq quramasy bapkerler quramynyń qyzmetkeri Qaırat Nurdáýletov arnaıy qonaq bolmaq.
