Fýtboldan elimizdiń 2021 jylǵy úzdik jas oıynshysy anyqtaldy
NUR-SULTAN. QazAqparat - Fýtboldan elimizdiń 2021 jylǵy úzdik jas oıynshysy anyqtaldy, dep habarlaıdy QazAqparat tilshisi.
Bul jóninde Qazaqstan kásipqoı fýtbol lıgasy málim etti.
Ótken jyldan bastap atalǵan júlde belgili fýtbolshy Anatolıı Ionkınniń qurmetine arnalatyn bolyp sheshildi. Oǵan byltyr Shymkenttiń «Ordabasy» komandasynyń jartylaı qorǵaýshysy Elhan Astanov laıyqty dep tanyldy. Ony úzdik retinde Qazaqstan chempıonatyna qatysýshy klýbtardyń kapıtandary, bapkerleri men basshylary tańdady.
Aıta ketsek, Anatolıı Ionkın el fýtbolynda shabýylshy retinde tanyldy. Aldymen týǵan jeri Oraldyń «Ýralets» komandasynda bastap, odan keıin «Spartak» (Semeı) jáne «Qaırat» (Almaty) komandalarynda dop tepti.
KSRO birinshiliginiń joǵarǵy lıgasynda 70 oıyn ótkizip, 25 gol soqty. Al birinshi lıgada 70 márte jasyl alańǵa shyǵyp, 39 márte qarsylastar qaqpasyn dál kózdedi.
Fýtbolshy mansabyn aıaqtaǵannan keıin «Jezqazǵan», «Ýralets» fýtbol klýbtarynda jáne «Kaınýr» shaǵyn fýtbol klýbynda bapker qyzmetin atqardy. Ulttyq, Olımpıadalyq jáne jastar qurama komandalaryn iri halyqaralyq jarystarǵa daıyndaýǵa kómektesti. Fýtzaldan Qazaqstan quramasynyń bas bapkeri boldy. Qazaqstan fýtbol federatsııasynda uzaq ýaqyt jumys istedi, 2001 jyldan bastap, 2009 jylǵa deıin Qazaqstan fýtbol federatsııasynda vıtse-prezıdent qyzmetin atqardy.
