Fýtboldan el chempıony «Tobyl» «Atyraýdan» jeńilip qaldy
NUR-SULTAN. QazAqparat – Fýtboldan Qazaqstan chempıonatynyń jetinshi týrynda «Atyraý» óz alańynda Qostanaıdyń «Tobylyn» qabyldady, dep habarlaıdy QazAqparat tilshisi.
Qazaqstandyq maman Konstantın Gorovenko jattyqtyratyn atyraýlyqtar osynyń aldynda eki ret qatarynan utylǵan edi. Al Aleksandr Moskalenkonyń shákirtteri ótken týrda óz alańynda «Qaıratpen» teń tarqasqan edi.
Bul joly birinshi taımda esep ashylǵan joq.
Ekinshi kezeńde «Tobyldyń» qaqpashysy Aleksandr Mokın «Atyraý» oıynshysyn shalyp jyqqannan keıin 11 metrlik aıyp doby belgilendi. Ony horvatııalyq Andrııa Fılıpovıch múlt jibergen joq – 1:0. Bul 66-mınýt edi.
Sodan keıin «Tobyl» sapyndaǵy ózbekstandyq shabýylshy Igor Sergeev 77-mınýtta tarazy basyn teńestirdi. Degenmen 83-mınýtta A.Fılıpovıch óziniń taǵy bir múmkindigin tamasha paıdalandy – 2:1.
Osylaısha bul matchtan keıin 10 upaı jınaǵan «Atyraý» týrnır kestesinde 5-orynǵa kóterildi. «Tobyl» 11 upaımen 3-satyda keledi.
Búgin sondaı-aq «Astana» óz alańynda «Kaspııdi» qabyldaıdy. Qalǵan oıyndar erteń ótedi.
Eske sala keteıik, budan buryn Qazaqstan chempıonatynda «Kaspııdiń» qaıtadan kósh basyna shyqqanyn jazǵan bolatynbyz.
