Fýtboldan el chempıonatynda Maqtaral jeńiske jetti
ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 21-týrynyń alǵashqy oıyn kúni ótti, dep habarlaıdy QazAqparat tilshisi.
Alǵashqy oıynda «Kaspıı» (Aqtaý) men «Aqsý» (Pavlodar oblysy) ózara sheberlik baıqasty. Komandalar týrnır kestesinde qatarlas keledi. Kezdesý taǵdyryn 41-mınýtta Rýan Teles soqqan jalǵyz gol sheshti. Osylaısha «Kaspıı» qarsylasyn 1:0 esebimen jeńip, týrnır kestesinde jetinshi orynǵa kóterildi. Alǵashqy bestikte turǵan komandalarǵa jaqyndaı tústi.
Taǵy bir kezdesýde «Ordabasy» Shymkentte «Atyraýdan» 2:0 esebimen basym tústi. Oıyn barysynda shymkenttik klýbtan Abylaıhan Dobaı 38, Odıl Abdýmajıdov 95-mınýtta mergendik tanytty.
Alǵashqy kúngi oıyndardy «Taraz» ben «Maqtaral» (Túrkistan oblysy) kezdesý qorytyndylady. Týrnır kestesinde tarazdyq klýb orta tusynda kele jatsa, túrkistandyq komanda kósh sońynda tur.
Kezdesý barysynda Jan -Alı 35-mınýtta soqqan jalǵyz gol «Maqtaralǵa» jeńis alyp keldi. Túrkistandyq klýb syrt alańda qarsylasynan 1:0 esebimen basym tústi.
Endi 2 qazanda «Tobyl» (Qostanaı) men «Shahter» (Qaraǵandy), «Qyzyljar» (Petropavl) men «Qaırat» (Almaty) komandalary kezdesedi.
Sondaı-aq, bul kúnge «Aqjaıyq» (Oral) pen «Aqtóbe», «Turan» (Túrkistan) men «Astana» kezdesýleri belgilengen.
