Fýtboldan el chempıonatynda «Astana» «Turanmen» teń oınady
NUR-SULTAN. QazAqparat – Fýtboldan Qazaqstan chempıontaty toǵyzynshy týrynyń alǵashqy matchy kútpegen nátıjemen aıaqtaldy, dep habarlaıdy QazAqparat tilshisi.
«Astana» óz alańynda «Turanmen» oıyndy teń aıaqtaýǵa májbúr boldy.
Elordalyqtar kósh basyndaǵy komandalardyń biri bolǵandyqtan, anyq favorıt edi.
Alaıda jetinshi týrda syrt alańda «Qaıratty» 1:0 esebimen jeńip ketken túrkistandyqtar da osal emes-ti. Aqyry solaı boldy da.
Besinshi mınýtta túrkistandyq Alııar Muhammedtiń aıyp alańyna kirmesten shirene tepken doby qaqpadan bir shyqty. Kóp uzamaı astanalyqtar esepti teńestirýge múmkindik aldy.
11-mınýtta Marın Tomasovtyń 11 metrlik núkteden tepken dobyn «Turan» qaqpashysy Erjan Toqotaev qaıtardy.
Degenmen 26-mınýtta Pedro Eýjenıo esepti teńestirgenimen, 40-mınýtta Abdýllaı Dıakate penaltıdi múltiksiz oryndady.
Al taım sońyndaǵy qosymsha mınýttarda Farhad Musabekov esepti 3:1-ge jetkizdi.
Ekinshi taımda 52-mınýtta P.Eýjenıo 11 metrlik aıyp dobyn dál oryndasa, sodan keıin 73-mınýtta M.Tomasovtan pas alǵan Raı Vlýt tarazy basyn teńestirdi – 3:3.
Budan soń A.Dıakateniń tepken doby qaqpa mańdaıshasynan keri qaıtty.
Alań ıeleri jeńisti julyp alýǵa tyrysqanymen, odan eshteńe shyqqan joq.
Komandalar teń oıynǵa qanaǵat bildirdi.
Osy oıynnan keıin 14 upaı jınaǵan «Astana» ázirge úshinshi orynda tursa, «Turan» 11-satyda keledi.
Eske sala keteıik, budan buryn «Qyzyljar» fýtbol klýbyna jańa bas bapker taǵaıyndalǵanyn, Nuraly Áliptiń «Zenıt» sapynda Reseı chempıony atanǵanyn jazǵan bolatynbyz.