Fýtboldan el chempıonatynda «Astana» ekinshi orynǵa kóterildi
NUR-SULTAN. QazAqparat – Fýtboldan Qazaqstan chempıonatynyń 18-týry «Astana» - «Aqjaıyq» matchymen túıindeldi, dep habarlaıdy QazAqparat tilshisi.
Elordalyqtar chempıondyqtan úmitker komandanyń biri bolsa, oraldyqtar týrnır kestesinde 13-orynǵa qaıtadan syrǵyp ketken edi.
Birden aıtý kerek, bul oıynda «Aqjaıyqta» birqatar ózgerister boldy. Ásirese, komandanyń surmergeni, grýzııalyq shabýylshy Toma Tabatadzeniń qosalqy quramǵa da enbeýi jankúıerler úshin túsiniksiz edi.
Birinshi taım alma-kezek shabýylmen ótti deýge bolady. 32-mınýtta buryshtamadan berilgen doptan keıin «Astana» sapyndaǵy belarýs qorǵaýshysy Denıs Polıakov qaqpany dál kózdedi – 1:0. Budan keıin qonaqtardyń tarazy basyn teńestiretindeı múmkindigi boldy, biraq dop qaqpa mańdaıshasynan keri qaıtty.
Ekinshi kezeńde oraldyqtar kóbirek shabýyldaǵanymen, odan eshteńe óngen joq. Esesine 84 jáne 86-mınýtta Pedro Eýjenıo mergendik tanytyp, esepti 3:0-ge jetkizdi. 92-mınýtta Marın Tomasov matchtyń núktesin qoıdy – 4:0.
Osylaısha, «Aqjaıyqty» iri eseppen utyp, upaı sanyn 34-ke jetkizgen astanalyqtar týrnır kestesinde ekinshi orynǵa kóterildi.
Kelesi týrda 10 qyrkúıekte «Aqjaıyq» óz alańynda Qaraǵandynyń «Shahterin» qabyldasa, «Astana» Aqtaýǵa qonaqqa barady.
Eske sala keteıik, budan buryn fýtboldan Qazaqstan chempıonatynda «Shahterdiń» «Tarazdy» tize búktirgenin jazǵan bolatynbyz.
Sýretterdi túsirgen Aıbatyr NURASh
