Fýtboldan el chempıonatynda «Aqjaıyq» qatarynan úshinshi ret jeńdi
NUR-SULTAN. QazAqparat – Fýtboldan Qazaqstan chempıonatynyń jetinshi týrynda «Shahter» Qaraǵandyda Oraldyń «Aqjaıyǵyn» qabyldady, dep habarlaıdy QazAqparat tilshisi.
Osyǵan deıin qarsylastar ózara 26 kezdesý ótkizip, sonyń 18-inde «Shahter», beseýinde «Aqjaıyq» basym túsken edi. 3 match teń aıaqtalǵan.
Ótken jyly «Aqjaıyq» syrt alańda 2:1 esebimen utsa, Oralda komandalar teń tarqasqan (1:1) bolatyn.
Munyń aldynda bıylǵy chempıonatta qatarynan eki ret jeńiske jetken «Aqjaıyq» óz quramyn ózgerte qoıǵan joq. Ótken týrda Tarazda utylyp qalǵan «Shahterge» 3 upaı aýadaı qajet edi.
Birinshi taımda komandalar alma-kezek shabýyldap baqqanymen, esep ashylǵan joq.
Oıynnyń ekinshi kezeńinde qarymta shabýyldan keıin 74-mınýtta qaqpashy Igor Shatskıımen betpe-bet shyqqan «Aqjaıyq» sapyndaǵy grýzııalyq legıoner Lýka Imnadze esep ashty – 1:0. Budan keıin alań ıeleri qansha tyrysqanymen, tarazy basyn teńestire almady.
Osylaısha, qatarynan úshinshi jeńisine qol jetkizgen ýkraınalyq maman Vladımır Mazıardyń shákirtteri 10 upaı jınap, týrnır kestesinde 7-orynǵa kóterildi.
«Aqjaıyqtyń» qaqpashysy, reseılik Stepan Sıkach tórtinshi match qatarynan óz qaqpasyna gol ótkizgen joq.
Kelesi týrda - 27 sáýirde qaraǵandylyqtar Aqtaýda «Kaspıımen» sheberlik baıqassa, oraldyqtar óz alańynda «Aqsýdy» qabyldaıdy.
Eske sala keteıik, budan buryn fýtboldan el chempıony «Tobyldyń» «Atyraýdan» jeńilip qalǵanyn jazǵan bolatynbyz. Sondaı-aq, Qazaqstan birinshiliginde «Astana» «Kaspııdi» iri eseppen jeńdi.
Sýretterdi túsirgen Aıbatyr Nurash
