Fýtboldan el chempıonatynda «Aqsý» «Aqjaıyqtan» basym tústi
NUR-SULTAN. QazAqparat - Fýtboldan Qazaqstan chempıonatynyń 20-týrynda «Aqsý» Pavlodarda «Aqjaıyqty» qabyldady, dep habarlaıdy QazAqparat tilshisi.
Birinshi aınalymda pavlodarlyqtar Oralda 1:0 esebimen jeńip ketken bolatyn.
«Aqsý» sońǵy oıyndaryn nátıjeli ótkizip, týrnır kestesiniń ortasyna ornalassa, oraldyqtar kósh sońyndaǵy qos komandanyń biri edi.
Tartysty ótken match taǵdyryn jalǵyz gol sheshti. Ekinshi taımda keıingi kezde babynda júrgen Erkebulan Tuńǵyshbaev mergendik tanytyp, óz komandasyna úsh upaıdy áperdi - 1:0.
Budan keıin pavlodarlyqtar upaı sanyn 26-ǵa jetkizdi.
Taǵy bir oıynda «Qaırat» Almatyda kútpegen jerden shymkenttik «Ordabasydan» utylyp qaldy. Bul matchta qonaqtardan Maksım Fedın esep ashsa, «Qaırattan» Joao Paýlo tarazy basyn teńestirdi. Alaıda oıyn sońyna taman Akmal Baqtııarov jeńis golyn soqty - 2:1. «Qaırat» pen «Ordabasy» besinshi-altynshy orynda keledi.
Eske sala keteıik, budan buryn Qazaqstan chempıonatynda «Aqtóbeniń» «Astanadan» bes upaıǵa uzap ketkenin, sondaı-aq «Turan» men «Kaspııdiń» jeńiske jetkenin jazǵan bolatynbyz.
Sýretterdi túsirgen Aıbatyr Nurash.
