Fýtboldan el chempıonatynyń kúntizbesi belgili boldy

ASTANA. KAZINFORM - Fýtboldan premer-lıga komandalary arasyndaǵy el birinshiliginiń kúntizbesi belgili boldy. Bıyl 33-shi márte jalaýyn kóteretin dop dodasy 1 naýryzda bastalyp, 10 qarashada máresine jetedi.

Alǵashqy týrda 1 naýryzda elordalyq «Astana» men «Jeńis» komandalary kezdesedi.

Bas qalanyń qos komandasy arasyndaǵy derbı jankúıerler arasynda úlken qyzyǵýshylyq týǵyzyp otyr.  

Dál sol kúni «Qaısar» (Qyzylorda) men «Aqtóbe», «Jetisý» (Taldyqorǵan) men «Aqsý» (Pavlodar oblysy) jasyl alańǵa shyǵady.

Al 2 naýryzda «Qaırat» (Almaty) pen «Qyzyljar» (Petropavl), «Elimaı» (Semeı) men «Atyraý», «Ordabasy» (Shymkent) men «Shahter» (Qaraǵandy), «Tobyl» (Qostanaı) men «Turan» (Túrkistan) sheberlik baıqasady.

Premer-Lıga chempıony ataǵy úshin bıyl respýblıkanyń 13 óńirinen 14 klýb talasady.

Oıyndardy «Qazsport», «Qsport» jáne jańa «Qfootball» telearnalary tikeleı efırde usynady. 

Eske salsaq, «Ordabasy» Winter Cup fýtbol týrnıriniń jeńimpazy atandy.