Fýtboldan el chempıonatynda «Jetisý» kósh basyndaǵy «Aqtóbeni» utty

ASTANA. KAZINFORM – Fýtboldan Qazaqstan chempıonatynyń altynshy týrynda búgin eki match ótkizildi.

Semeıdiń «Elimaı» komandasy óz alańynda ótken jylǵy el chempıony shymkenttik «Ordabasyny» qabyldady.

Premer-lıgaǵa bıyl ǵana qosylǵanyna qaramastan, semeılikter chempıonatty jaman ótkizip jatqan joq. Osyǵan deıin eki kezdesýinde jeńse, bir oıynda teń oınady. Taǵy bir matchta jeńilis tapty.

Bul joly oıyn bastalysymen 3-mınýtta alań ıelerinen Sada Tıýb esep ashty. 10 mınýttan keıin Baýyrjan Islamhannyń aıyp alańyna bergen dobyn «Elimaı» qaqpashysy Denıs Kavlınov qaıtara almady. Osy múmkindikti Dembo Darbo sátti paıdalanyp ketti – 1:1. 

Taǵy bir kezdesý Taldyqorǵanda «Jetisý» men týrnır kestesinde kósh bastap kele jatqan «Aqtóbe» arasynda ótti. Bul oıynda 20-mınýtta oń qaptaldan Anton Shramchenko baǵyttaǵan dop Igor Shatskıı qorǵaǵan «Aqtóbe» qaqpasyna kirip ketti. 

Ekinshi kezeńde 50-mınýtta Maksım Samorodov oryndaǵan aıyp dobynan keıin Barach Mateo tarazy basyn teńestirdi – 1:1. Degenmen 70-mınýtta Ashat Baltabekov soqqan dop Qaırat Nurdáýletovtiń shákirtterine jeńis áperdi – 2:1.

Osy týrdan keıin 10 upaı jınaǵan «Jetisý» kósh basyndaǵy «Aqtóbe» men «Astanany» qýyp jetip, úzdik úshtikke endi.

Jetinshi týrda 4 mamyr kúni ortalyq match Aqtóbede jergilikti klýb pen «Astana» arasynda ótedi. Sondaı-aq Qostanaıdyń «Tobyly» «Jetisý» komandasyn qabyldaıdy.

Eske sala keteıik, budan buryn fýtboldan Qazaqstan chempıonatynda «Astananyń» ekinshi orynǵa kóterilgenin jazǵan bolatynbyz.

Sondaı-aq «Qaırat» kósh sońyndaǵy «Qaısardan» utyldy.