Fýtboldan el chempıonaty: «Qaırat» kósh sońyndaǵy «Qaısardan» utyldy
ASTANA. KAZINFORM — Fýtboldan premer-lıga komandalary arasynda Qazaqstan chempıonatynyń 6-týrynda Qyzylordanyń «Qaısary» óz alańynda Almatynyń «Qaıratyn» qabyldady.
Almatylyqtar buǵan deıin top bastaýshylardyń qatarynda bolsa, qyzylordalyqtar kósh sońynda edi.
Birinshi taım teń jaǵdaıda ótkenimen, ekinshi kezeńde jıirek shabýyldaǵan almatylyqtar óz múmkindikterin paıdalana almady. Esesine 94-mınýtta «Qaırattyń» qaqpashysy Danıl Ýstımenko dopty ýysynan shyǵaryp alǵannan keıin Aıbar Jaqsylyqov jeńis golyn soǵyp ketti – 1:0.
«Qaırat» 8 upaımen týrnır kestesinde 6-orynda qalsa, «Qaısar» (4 upaı) 12-satyda tur.
Jeksenbi kúni «Elimaı» (Semeı) – «Ordabasy» (Shymkent) jáne «Jetisý» - «Aqtóbe» matchtary ótedi.
Eske sala keteıik, budan buryn fýtboldan Qazaqstan chempıonatynda «Astananyń» ekinshi orynǵa kóterilgenin jazǵan bolatynbyz.
