Fýtboldan el birinshiligi bastalar aldynda «Atyraý» komandasy bas bapkersiz qaldy

ASTANA. KAZINFORM – Belarýstik maman Vıtalıı Jýkovskıı «Atyraý» klýbynyń bas bapkeri qyzmetinen ketti. Bul jóninde komandanyń baspasóz qyzmeti málim etti.

– Sheshim ekijaqty kelisim negizinde júzege asty. Vıtalıı Leonıdovıch atyraýlyq klýb tizginin alǵash ret 2022 jyldyń jazynda ustady. Úsh jyldan astam ýaqyt ishinde komandamen 85 oıyn ótkizip, 28 jeńiske jetti, 28 kezdesýdi teń aıaqtap, 29 ret jeńilis tapty, - dep jazylǵan habarlamada. 

Aıta ketsek, Belarýs mamany 2025 jyldyń 1 jeltoqsanynda atyraýlyq klýbta qyzmetin qaıta jalǵastyratyny jóninde kelisimge kelgen edi. 

Atalǵan maman 2022-2024 jyldary aralyǵynda «Atyraý» bas jattyqtyrýshysy bolyp, komandany Qazaqstan kýbogynyń fınalyna shyǵardy. El chempıonaty aıasynda keıingi jyldardaǵy úzdik nátıjeni (7-oryn) kórsetken edi. 

Aıta ketsek, «Atyraý» bıylǵy maýsymdaǵy alǵashqy matchtaryn Túrkistan qalasyndaǵy «Túrkistan Arenada» ótkizedi. Atyraý qalasyndaǵy «Munaıshy» stadıonynda qaıta jańǵyrtý jumystary júrgizilip jatyr. Osyǵan baılanysty arena ýaqytsha jabylǵan. 

Dop dodasynyń alǵashqy týrynda, ıaǵnı «munaıshylar» 8 naýryzda «Ulytaý» komandasymen sheberlik baıqasady.