Fýtboldan el birinshiligi: «Astana» men «Ordabasy» upaı joǵaltty

ASTANA. KAZINFORM - Elordalyq «Astana» fýtboldan Qazaqstan Premer-lıgasynyń úshinshi týrynda Semeıdiń «Elimaı» klýbyna ese jiberdi.

Bıyl fýtbol sarapshylary bas júldeden úmitker retinde elordalyq klýbty ataıdy. Ótken jyly altyn medal qoldan sýsyp ketkennen keıin elordalyq komanda quramyna kóptegen tájirıbeli oıynshylardy tartty. Alǵashqy eki týrda upaıdan shashaý shyǵarmaǵan «Astana» bul joly jasyl alańǵa tórinde jarqyldap oıyn kórsete alǵan joq. Birinshi lıgadan bıyl ǵana úzdikter qataryna qosylǵan «Elimaı» olarǵa laıyqty qarsylyq kórsetti. 

Oıyn taǵdyryn sheshken jalǵyz goldy semeılik klýbtan Roman Murtazaev 87-mınýtta óziniń enshisine jazdy. 

Osylaısha «Elimaı» azýly qarsylasynan aılasyn asyryp, týrnır kestesindegi jaǵdaıyn jaqsartyp aldy. Buǵan deıin sońǵy oryndardyń birin mise tutqan olar segizinshi orynǵa kóterildi.

Taǵy bir kezdesýde Shymkenttiń «Ordabasy» klýby óz alańynda Almatynyń «Qaırat» komandasyna 1:2 esebimen ese jiberdi.

Byltyr óz tarıhynda alǵash ret chempıondyq ataqqa qol jetkizgen shymkenttik klýb bıyl sol jeńisti jolyn jalǵastyramyz degen úmitte. Qatarynan eki márte jeńiske jetip, týrnır kestesinde kósh basynda turǵan komanda búgin de úsh upaı oljalaýǵa kúsh salatyny anyq edi.

Dese de «Qaırat» oǵan múmkindik bergen joq. 

Oıynnyń 43-mınýtynda olardyń qatarynan Ádilet Sádibekov qaqpany dál kózdese, odan keıin Joao Paýlo 68-mınýtta mergendik tanytty.

Al 84-mınýtta «Ordabasy» sapynan Djasýrbek ıAhshıboev esep aıyrmasyn qysqartty.
Eske salsaq, budan buryn óz alańynda «Atyraý» «Jetisýǵa» 0:1,«Shahter» «Turanǵa» 0:2 esebimen jeńilse, «Aqtóbe» «Jeńisti» 3:0 esebimen tize búktirdi.

Al «Qyzyljar» men «Tobyl» 0:0 esebine qanaǵat bildirdi.

Endi aldaǵy tórtinshi týr oıyndary 6 jáne 7 sáýir kúnderi ótkiziledi. Bul týrda «Kyzyljar» men «Jeńis», «Elimaı» men «Qaısar», «Qaırat» pen «Jetisý», 7 sáýirde «Aqtóbe» men «Atyraý», «Shahter» men «Astana», «Turan» men «Ordabasy» kezdesedi.