Fýtboldan el birinshiliginiń kúntizbesi jarııalandy
NUR-SULTAN. QazAqparat - Fýtboldan bıylǵy Qazaqstan birinshiliginiń kúntizbesi jarııalandy, dep habarlaıdy QazAqparat tilshisi.
Bul jóninde Qazaqstan kásipqoı fýtbol lıgasy habarlady.
Esterińizge sala ketelik, dop dodasy 2 naýryzda Qazaqstan sýperkýbogy oıyndarymen bastalady. Bul týrnırde Almatynyń «Qaırat», Qostanaıdyń «Tobyl», elordanyń «Astana» jáne Qaraǵandynyń «Shahter» komandalary synǵa túsedi. Fınal 6 naýryzda oınalady.
Qazaqstan birinshiliginiń alǵashqy týry 13 jáne 14 naýryz kúnderi bolady. Aldymen 13 naýryzda «Qaırat» (Almaty) men «Jetisý» (Taldyqorǵan), «Arys» (Túrkistan oblysy) pen «Astana» (Nur-Sultan), «Atyraý» men «Shahter» (Qaraǵandy) jasyl alańǵa shyǵady.
Al, 14 naýryzda «Qaısar» (Qyzylorda) men «Taraz», «Kaspıı» (Aqtaý) men «Aqtóbe», «Tobyl» (Qostanaı) men «Aqjaıyq» (Oral), «Ordabasy» (Shymkent) men «Qyzyljar» (Petropavl) komandalary sheberlik baıqasady.
Dop dodasy eki aınalym boıynsha ótkiziledi. Sońǵy týr 30 qazanda ótedi.
