Fýtboldan el birinshiliginde «Tobyl» men «Astana» teń tústi
NUR-SULTAN. QazAqparat - Fýtboldan Premer-lıga komandalary arasyndaǵy Qazaqstan birinshiligi segizinshi týrynyń alǵashqy oıyn kúni aıaqtaldy, dep habarlaıdy QazAqparat tilshisi.
Atalǵan týrdaǵy basty kezdesý qostanaılyq «Tobyl» men elordalyq «Astana» komandalary arasynda ótti.
Jeti týrdan keıin 12 upaımen «Astana» kósh basynda kele jatqan bolatyn. Al «Tobyl» 11 upaımen ázirge besinshi orynda turǵan edi.
Kezdesý barysynda komandalar tartysty oıyn ótkizdi. Olardyń tarapynan gol soǵatyn birneshe múmkindik bolǵan edi.
Qostanaılyq komanda budan burynǵy úsh týrda ketken qateliginiń ornyn toltyrýǵa kúsh saldy. Olar úsh oıynda nebári bir upaıǵa qol jetkizip, týrnır kestesindegi jaǵdaıyn birshama qıyndatyp aldy.
Oıynnyń birinshi kezeńinde 33-mınýtta «Tobyl» oıynshysy Jarko Tomashevıch mergendik tanytty. Osylaısha ózi byltyr jeıdesin kıgen komandany qapy qaldyrdy.
Ekinshi kezeńde «Astana» tarazy basyn teńestirýge umtyldy. Nátıjesinde 54-mınýtta Pedro Eýjenıo kózdegen nysanadan múlt ketken joq.
Kezdesýde komandalar 1:1 esebine qanaǵat bildirdi.
Sondaı-aq, búgin Shymkenttiń «Ordabasy» komandasy óz alańynda Almatynyń «Qaıratyn» 2:1 esebimen tize búktirdi.
Endi jetinshi týrdaǵy qalǵan bes oıyn 27 sáýir kúni ótkiziledi.