Fýtboldan el birinshiliginde «Tobyl» «Qaırattan» basym tústi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń 18-týrynda Qostanaıdyń «Tobyly» «Qaırattan» basym tústi, dep habarlaıdy QazAqparat tilshisi.
Bul oıyn atalǵan týrdaǵy basty kezdesýdiń biri boldy. Týrnır kestesinde eki komanda qatarlas kele jatqan edi. Jeńgen komanda alǵashqy úshtikke kóteriletin.
Qostanaılyq klýb oıyn basynan tizgindi óz qolyna alýǵa kúsh saldy. Nátıjesinde birinshi kezeńde Igor Sergeev 26, Aıbar Jaqsylyqov 42-mınýttarda gol soǵyp, «Tobyl» komandasyn alǵa shyǵardy. «Qaırat» shabýylshysy Artýr Shýshenachev 53-mınýtta esep aıyrmasyn qysqartqan edi. Oıynnyń 76-mınýtynda Igor Sergeev taǵy da kózdegen nysanadan múlt ketken joq. «Qaırattyń» jartylaı qorǵaýshysy Gúljigit Alyqulov 90-mınýtta penaltıdi sheber oryndady.
Osylaısha «Qaırat» óz alańynda qarsylasyna 2:3 esebimen ese jiberdi. «Tobyl» 32 upaımen ekinshi orynǵa kóterildi.
Dál qazir «Aqtóbe» men «Qyzyljar» (Petropavl) kezdesýiniń birinshi kezeńi aıaqtaldy. Ázirge esep 0:0.
Atalǵan týrdy 21:00-de «Astana» (Nur-Sultan) men «Aqjaıyq» (Oral) oıyny túıindeıdi.
Atalǵan týrda 4 qyrkúıekte óz alańynda «Atyraý» óz alańynda Aqtaýdyń «Kaspııinen» 3:2 esebimen basym tússe, Pavlodar oblysynyń «Aqsýy» Túrkistan oblysynyń «Maqtaralyn» 4:2 esebimen jeńdi.
Sondaı-aq Shymkenttiń «Ordabasy» klýby óz alańynda Túrkistannyń «Turanyna» 1:2 esebimen jol berdi.
Taǵy bir kezdesýde Qaraǵandynyń «Shahteri» óz alańynda «Tarazdy» 1:0 esebimen tize búktirdi.
