Fýtboldan el birinshiliginde «Ordabasy» kósh basyna kóterildi
NUR-SULTAN. QazAqparat – Fýtboldan Qazaqstan chempıonatynyń segizinshi týrynda «Ordabasy» Shymkentte Almatynyń «Qaıratyn» qabyldady, dep habarlaıdy QazAqparat tilshisi.
Ótken týrda shymkenttikter óz alańynda «Qyzyljardy» 3:1 esebimen tize búktirip, týrnır kestesinde 4-orynǵa kóterilgen edi.
Al Qurban Berdyevtiń shákirtteri Almatyda kútpegen jerden «Turannan» jeńilis tapqan bolatyn.
Birinshi taımda qonaqtardyń qorǵaýshysy Egor Tkachenko óz aıyp alańynda qolmen oınaǵannan keıin 11 metrlik aıyp doby belgilendi.
Ony 11 mınýtta Elhan Astanov múltiksiz paıdalandy. Degenmen 31-mınýtta almatylyq Artýr Shýshenachev tarazy basyn teńestirdi.
Ekinshi taımda 52-mınýtta «Ordabasynyń» surmergeni, frantsııalyq Serj Nıýadzı komandasyn alǵa shyǵardy – 2:1.
Sodan keıin 76-mınýtta «Qaırat» sapyndaǵy portýgalııalyq Rıkardo Alvesh tepken penaltıdi «Ordabasy» qaqpashysy Bekhan Shaızada qaıtaryp, almatylyqtardyń esepti teńestirýine múmkindik bergen joq.
Osylaısha, 14 upaı jınaǵan Aleksandr Sednevtiń shákirtteri týrnır kestesinde birinshi orynǵa kóterildi.
Eske sala keteıik, búgin fýtboldan el chempıonatynyń segizinshi týry bastalatynyn jazǵan bolatynbyz.
