Fýtboldan el birinshiliginde «Astana» óz alańynda «Tobyldan» jeńildi
NUR-SULTAN. QazAqparat - Fýtboldan Premer-lıga komandalary arasyndaǵy el birinshiliginiń 20-týrynda elordalyq «Astana» óz alańynda Qostanaıdyń «Tobylyn» qabyldady, dep habarlaıdy QazAqparat tilshisi.
Eki komanda týrnır kestesinde qatarlas keledi. Olardyń quramynda tájirıbeli fýtbolshylar jeterlik. Jylda úzdikter qatarynda kórinýge umtylady. Sondyqtan jankúıerler atalǵan kezdesýden tartysty oıyn kútti.
Oıyn basynan komandalar bir-biriniń qaqpasy mańynda jıi boı kórsetti. Alań ıeleri qostanaılyq klýb qaqpasy mańynda kóbirek shabýyl uıymdastyrdy. Osyndaı sátterdiń birinde «Tobyl» qorǵaýshylary elordalyq shabýylshy Abat Aıymbetovti óziniń aıyp alańynda shalyp jyqty. Tóreshi belgilegen penaltıden «Astana» fýtbolshysy Marın Tomasov múlt ketti.
Al 30-mınýtta elordalyq komanda qaqpasyna belgilengen penaltıde qostanaılyq Serikjan Mýjıkov qaqpa toryn týlatty. «Astana» shabýylshysy Abat Aıymbetov 35-mınýtta tarazy basyn teńestirdi.
Oıynnyń 72-mınýtynda qostanaılyq komandadan Sergeı Malyı jeńis golyn soqty.
Osylaısha «Astana» qarsylasyna 1:2 esebimen jol berdi.
Endi 21:00-de «Aqtóbe» men «Taraz» sheberlik baıqasady.
Al 15 qyrkúıekte «Atyraý» men «Turan», «Shahter» men «Kaspıı», «Aqsý» men «Aqjaıyq», «Qaırat» pen «Ordabasy», «Maqtaral» men «Qyzyljar» kezdesedi.
