Fýtboldan el birinshiliginde «Astana» «Ordabasyny» jeńdi
NUR-SULTAN. QazAqparat - Fýtboldan Premer-lıga komandalary arasyndaǵy Qazaqstan birinshiliginiń onynshy týrynda elordalyq «Astana» syrt alańda Shymkenttiń «Ordabasy» klýbyn jeńdi, dep habarlaıdy QazAqparat tilshisi.
Kezdesý barysynda eki komanda tartysty oıyn ótkizdi. Gol soǵatyn kóptegen múmkindik boldy. Alaıda, ony tıimdi paıdalana alǵan joq.
Oıynnyń 16-mınýtynda elordalyq komanda sapynan Pedro Eýjenıo mergendik tanytty. Oǵan 44-mınýtta Serj Nıýadzı bir golmen jaýap qaıyrdy.
Ekinshi kezeńde komandalar kóbirek shabýylǵa shyqty. Degenmen, olardyń tepken doptary dittegen nysanasyna jetpeı jatty. Kezdesýdiń 95-mınýtynda elordalyq Stanıslav Basmanov jeńis golyn soqty.
Osylaısha, «Astana» qarsylasynan 2:1 esebimen basym tústi.
Bul jeńisinen keıin elordalyq klýb 17 upaı jınap, týrnır kestesinde ekinshi orynǵa kóterildi.
Sondaı-aq, búgin Petropavldyń «Qyzyljary» men «Taraz» komandalary 1:1 esebine qanaǵat bildirdi.
Atalǵan týrda búgin 20:00-de «Qaırat» (Almaty) pen «Atyraý», «Tobyl» (Qostanaı) men «Aqsý» (Pavlodar oblysy) komandalary kezdesedi.
Erteń, 8 mamyrda «Aqjaıyq» (Oral) pen «Maqtaral» (Túrkistan oblysy), «Kaspıı» (Aqtaý) men «Aqtóbe», «Turan» (Túrkistan) men «Shahter» (Qaraǵandy) komandalary sheberlik baıqasady.
Buǵan deıin fýtboldan Qazaqstan birinshiligi bastalatyny jazylǵan.