Fýtboldan el birinshiliginde «Astana» «Qaıratty» oısyrata jeńdi
ASTANA. QazAqparat - Búgin fýtboldan Premer-lıga komandalary arasyndaǵy el birinshiliginiń 23-týry máresine jetti, dep habarlaıdy QazAqparat tilshisi.
Bul týrda kósh basynda kele jatqan tórt komanda ózara kezdesti.
Qostanaıda «Tobyl» birinshi orynda kele jatqan «Aqtóbemen» kezdesti. Oıyn taǵdyryn sheshken jalǵyz goldy Serikjan Mýjıkov 87-mınýtta penaltıden soqty.
Al Almatyda jergilikti «Qaırat» elordalyq «Astana» komandasyn qabyldady. Áli de chempıondyqqa talasyp kele jatqan elordalyq klýb atalǵan oıynda alań ıeleri qaqpasyna jaýapsyz tórt gol soqty. Kezdesý barysynda «Astananyń» jartylaı qorǵaýshysy Tımýr Dosmaǵambetov 10, 58, 88, 90-mınýttarda qarsylas komanda qaqpasyn dál kózdep, pokerdiń avtory atandy.
Osylaısha «Astana» klýby «Aqtóbeden» bir upaıǵa ǵana qalyp tur. Chempıondyq taǵdyry aldaǵy oıyndarda sheshiledi.
Sondaı- aq, búgin Petropavldyń «Qyzyljary» «Atyraýdan» 3:1 esebimen basym tústi.
Al 14 qazanda Túrkistan oblysynyń «Maqtaraly» syrt alańda Aqtaýdyń «Kaspııin» 4:2 esebimen tize búktirse, Oraldyń «Aqjaıyǵy» óz alańynda «Tarazben» 0:0 esebine qanaǵat bildirdi.
Taǵy eki kezdesýde Shymkenttiń «Ordabasy» klýby óz alańynda Qaraǵandynyń «Shahterin» 1:0 esebimen jeńse, Túrkistannyń «Turany» sol eseppen Pavlodar oblysynyń «Aqsýyna» jol berdi.
