Fýtboldan el birinshiligi: «Jetisý» Shymkentte «Ordabasyn» jeńip ketti
ASTANA. QazAqparat - Búgin, 29 shildede elimizdiń úsh qalasynda fýtboldan Premer-lıga komandalary arasyndaǵy el birinshiliginiń 20-týr oıyndary bolyp ótti, dep habarlaıdy QazAqparat tilshisi.
Pavlodarda «Ertis» Qaraǵandynyń «Shahterin» qabyldady. Bul oıynda «Ertis» sapynan brazılııalyq Rodrıgo 56-mınýtta esep ashqan edi. Oǵan «Shahter» qatarynan chernogorııalyq Damır Koıashevıch 64-mınýtta jaýap qaıyrdy. Oıynda qos komanda 1:1 esebimen teń tarqasty.
Al Shymkenttegi «Ordabasy» men Taldyqorǵannyń «Jetisý» komandalary arasyndaǵy kezdesýde qonaqtar alǵashqy bolyp esep ashty. 15-mınýtta taldyqorǵandyq Mantas Kýklıs óz komandasyn alǵa shyǵarsa, 31-mınýtta Edgar Malakıan esepti ústemeleı tústi. Esep 2:0, «Jetisý» alǵa shyqty. Al «Ordabasy» sapynan Abdýllaı Dıakate 67-mınýtta penaltıdi múltiksiz oryndap, esep aıyrmasyn qysqarta tústi. Oıyn 2:1 esebimen «Jetisýdyń» jeńisimen aıaqtaldy.
Ótken týrda óz alańynda «Ordabasy» «Qaıratty» 2:1 esebimen tize búktirse, «Jetisý» dál osy eseppen Taldyqorǵanda «Aqtóbege» jol berdi.
Esterińizge sala ketelik, 28 sáýirde el birinshiliginde 3 oıyn bolyp ótti. Qyzylordanyń «Qaısary» óz alańynda Petropavldyń «Qyzyljaryn» 2:1, «Astana» «Atyraýdy» 2:0 esebimen jeńse, «Aqjaıyq» pen «Atyraý» komandalary 1:1 esebimen teń tarqasty.
Kelesi 21-týr oıyndary 4 jáne 5 tamyz kúnderi bolady. Bul týrda 4 tamyzda «Jetisý» men «Aqjaıyq», «Atyraý» men «Qaısar», «Aqtóbe» men «Astana» komandalary kezdesedi. Al 5 tamyzda «Shahter» men «Qaırat», «Tobyl» men «Ordabasy», «Qyzyljar» men «Ertis» komandalary sheberlik baıqasady.
