Fýtboldan el birinshiligi: «Ordabasy» «Qaırattan» basym tústi
Shymkent qalasynda ótken jergilikti «Ordabasy» men Almatynyń «Qaırat» komandalary arasyndaǵy oıyn tartysty órbidi. Onyń sebebi de joq emes. «Qaırat» jylma-jyl chempıon atanýdan úmitker bolyp sanalady. Sondyqtan árbir kezdesý olar úshin mańyzdy ekeni belgili. Basty qarsylasy - «Astana» ázirge qara úzip kete qoıǵan joq. Elordalyq ujym «Qaırattan» eki oıyn artyq ótkizgen. Nebári 6 upaı ǵana alda. Sol sebepti qalǵan kezdesýlerde «Qaırat» upaı joǵalta qoımaǵan jaǵdaıda bıylǵy birinshiliktiń bas júldesin qanjyǵaǵa baılaýy ábden múmkin.
«Ordabasy» da joǵary jetistikke qol jetkizýdi qalaıdy. Dese de olardyń da ala-qula oıyndary jankúıer kóńilinen shyǵa almaı júr. Bas bapkerdi aýystyryp úlgerdi. Qazir bul qyzmetti grýzın mamany Kahaber Tshadadze atqarady. Ol budan burynǵy kezeńde «Qaıratta» bas bapker qyzmetin atqarǵany belgili. Sondyqtan ol óziniń burynǵy komandasymen kezdesýde shákirtterin erekshe daıyndaıtyny aıdan-anyq edi.
Shymkenttegi oıyn «Qaırat» úshin sátsiz bastaldy. Aldymen «Ordabasy» klýby gol soǵyp ketti. Ony 13-mınýtta Temirlan Erlanov óz enshisine jazdy. Budan keıingi kezekte «Qaırat» tarazy basyn teńestirýge umtyldy. Dese de degenderine jete alǵan joq. Olar uıymdastyrǵan shabýyl óte álsiz órbidi. Dittegen maqsatyna jete almady. Almatylyqtar oıyndy 56-mınýtta teńestirdi. Bul sátte «Qaırat» sapynan Aderınsola Eseola mergendik tanytty. Budan keıin «Qaırat» jeńiske jetýge jaqyn boldy. Birqatar shabýyl órbitti. Degenmen ol sátterde almatylyqtar jınaqy qımyl kórsete alǵan joq. Esesine olar 85-mınýtta óz qaqpasy aldynda tártip buzýǵa májbúr boldy. «Ordabasy» shabýylshysy Jasulan Moldaqaraevty shalyp jyqqany úshin penaltı belgilendi. Ony Abdýllaı Dıakate múlt jibergen joq.
Oıyn 2:1 esebimen «Ordabasynyń» jeńisimen aıaqtaldy. Osylaısha Kahaber Tshadadze óziniń burynǵy komandasyn jeńip ketti. «Qaırat» chempıon ataný múmkindigin taǵy da qıyndatyp aldy.
Eske salaıyq, keshe 21 shilde kúni Qazaqstan birinshiliginiń 19-týr oıyndary aıasynda úsh match ótti. Taldyqorǵannyń «Jetisýy» óz alańynda «Aqtóbege» 1:2 esebimen jol berse, Qaraǵandydaǵy oıynda jergilikti «Shahter» Qyzylordanyń «Qaısarymen» 2:2 esebimen teń tústi. Sondaı-aq Atyraýda jergilikti «Atyraý» men Oraldyń «Aqjaıyǵy» kezdesip, oıyn 2:0 esebimen atyraýlyqtardyń paıdasyna aıaqtaldy.
19-týr oıyndary aıasynda búgin, sondaı-aq Qostanaıdyń «Tobyly» men Pavlodardyń «Ertisi» oınady. Qostanaı jerinde ótken matchtyń qorytyndysy 1:1 boldy.
Aıta keteıik, bul týrdaǵy «Qyzyljar» men «Astana» arasyndaǵy oıyn bıylǵy 25 sáýirde ótip, syrt alańda elordalyqtar 2:0 esebimen jeńiske jetken bolatyn.
Kelesi, 20-týr oıyndary 28 jáne 29 shilde kúnderi ótedi. 28 shildede «Qaısar» men «Qyzyljar», «Astana» men «Atyraý», «Aqjaıyq» pen «Atyraý» komandalary kezdesse, 29 shildede «Ordabasy» men «Jetisý», «Qaırat» pen «Tobyl», «Ertis» pen «Shahter» komandalary ózara sheberlik baıqasady.