Fýtboldan el birinshiligi: Komandalardyń daıyndyǵy qandaı

28 shildede Qyzylorda qalasynda jergilikti «Qaısar» men Petropavldyń «Qyzyljar» komandalary kezdesedi. Atalǵan klýbtar búginge deıin 26 márte sheberlik baıqasyp, «Qyzyljar» 11 márte jeńiske jettip, al 10 kezdesýde «Qaısar» basymdyǵyn tanytqan. 5 kezdesý teń aıaqtaldy. Sońǵy ret eki komanda osydan toǵyz jyl buryn,  2008 jyldyń 27 sáýirinde oınap, onda «Qyzyljar» 1:0 esebimen úsh upaıdy oljalap ketti. Aıta keterligi, «Qaısar» 9 mamyrdan beri óz alańynda jeńiske jete almaı júr. «Qaısar» sol joly Qaraǵandynyń «Shahterinen» 3:0 basym túsken edi. Atalmysh jeńisinen keıin qyzylordalyq fýtbolshylar Qyzylordada 2 márte jeńilip, 3 márte teń tústi. Jankúıerler oıyndy saǵat 19.00-de tamashalaı alady.

Dál osy kúni elordada «Astana» men «Atyraý» jasyl alańǵa shyǵady. Komandalar buǵan deıin 24 márte tartysqa tústi. Nátıjesinde «Astana» 15 márte myqty ekenin dáleldese, «Atyraý» 4 ret aılasyn asyryp ketti. Al 5 kezdesýde jeńimpaz anyqtalǵan joq. «Atyraý» atalmysh qarsylasyn elorda tórinde sońǵy márte 2013 jyldyń 21 shildesinde 1:0 esebimen jeńgen eken. Sodan beri «Astana» enshisinde 5 jeńis bolsa, bir kezdesýde 0:0 esebi tirkeldi. Byltyr «Atyraý» atalmysh qarsylasynan Astanada 0:7 esebimen oısyraı jeńilgenin jankúıerler jaqsy biledi. Ony búgingi 19.00-de bastalatyn oıyn barysynda baǵamdaımyz.

Oralda jergilikti «Aqjaıyq» kórshiles oblystyń «Aqtóbe» komandasyn qabyldaıdy. Aıta keterligi, Batys Qazaqstan oblysynyń klýby atalmysh qarsylasynan óz alańynda sońǵy ret 2012 jyldyń 15 sáýirinde 1:0 esebimen basym tústi. Sodan beri barlyǵy 6 kezdesý ótip, «Aqjaıyq» «Aqtóbeniń» osal tusyn taba almaı keledi. Syrt alańda «Aqtóbe» bıyl 3 márte jeńiske jetken. Al «Aqjaıyq» Oralda ústimizdegi jyly 5 márte úsh upaı oljalady. Kezdesý saǵat 20.00-de bastalady.

29 shildede Almatyda «Qaırat» pen Qostanaıdyń «Tobyly» sheberlik baıqasady. Bıyl týrnır kestesinde qos komanda ekinshi jáne úshinshi oryndarda tur. «Tobyl» Almatyda sońǵy ret 2010 jyldyń 7 mamyrynda 1:0 esebimen súrindirgen. Odan beri qos komanda qanshama márte Alataý bókterinde oınady. 2011 jyly 26 maýsymda olar 0:0 esebimen teń tústi. Qalǵan kezdesýdiń barlyǵynda «Qaırat» myqtylyǵyn tanytyp keledi. Jalpy, qos komanda arasyndaǵy jekpe-jekte «Qaırat» 25 márte jeńiske jetip, 20-da qostanaılyq ujym úsh upaı oljalasa,  11 oıyn teń aıaqtaldy. Kezdesý saǵat 19.00-de bolady.

Taǵy bir oıyn Pavlodarda «Ertis» pen Qaraǵandynyń «Shahter» komandalary arasynda bolady. Qos komanda buǵan deıin 71 márte jolyqqan. «Ertis» 38 márte jeńse, «Shahter» 16 ret jeńip, 17 oıyn teń aıaqtalǵan. Bıyl qos komanda da nashar oınap júr. Týrnır kestesinde «Ertis» 9, «Shahter» 11 orynda tur. Pavlodar komandasy óz alańyndaǵy oıyndardyń nebári 4-de ǵana úsh upaı alsa, qalǵanynyń barlyǵynda qarsylastyń yǵyna jyǵyldy. Syrt alańda jeńiske jetý jóninen «Shahterdiń» de qorjyny bos. Nebári 1 oıynda ǵana jeńiske jetken. Kezdesý saǵat 19.00-de bolady.

Shymkentte jergilikti «Ordabasy» Taldyqorǵannyń «Jetisý» komandasyn qabyldaıdy. «Ordabasy» atalmysh qarsylasynan 13 márte basym túsip, 12 ret teń túsip, 13 ret jeńilis tapqan. Sońǵy ret «Jetisý» Shymkentte «Ordabasyny» 2016 jyly 29 mamyrda 1:0 esebimen tize búktirgen. Ústimizdegi jyly «Ordabasy» týrnır kestesinde alǵashqy bestikte kele jatsa, «Jetisý» da ortan belinde tur. Bul oıyndy jankúıerler saǵat 20.00-de tamashalaı alady.

Ótken týrda óz alańynda «Ordabasy» «Qaıratty» 2:1, «Atyraý» «Aqjaıyqty» 2:0 esebimen  tize búktirse , «Tobyl» men «Ertis» 1:1, «Shahter» men «Qaısar» 2:2 esebimen teń oınap, «Jetisý» «Aqtóbeden» 1:2 esebimen jeńilip qaldy.