Fýtboldan el birinshiligi: «Qaırat» «Tobyldy» tize búktirdi
ALMATY. QazAqparat - Búgin Almatyda fýtboldan Premer-lıga komandalary arasyndaǵy el birinshiliginiń 20-týryndaǵy ortalyq oıyn bolyp ótti. Ońtústik astananyń «Qaırat» komandasy óz alańynda Qostanaıdyń «Tobylyn» qabyldap, olardan 1:0 eebimen basym tústi, dep habarlaıdy QazAqparat tilshisi.
Jankúıerler qos komandanyń bıyl týrnır kestesinde úzdik úshtikte kele jatqanyn jaqsy biledi. «Qaırat» ekinshi orynda bolsa, «Tobyl» úzdik úshtikti túıindep tur. Sondaı-aq, eki komanda da ústimizdegi jyly Eýropa lıgasynda el namysyn qorǵap júrgeni jaıy bar. Atalmysh klýbtar birinshi irikteý kezeńinen irkilmeı ótti. «Qaırat» birinshi irikteý kezeńinde Andorranyń «Engordan» klýbyn eki oıynda 10:1 (7:1, 3:0) esebimen jeńip, ekinshi irikteý kezeńiniń birinshi oıynynda Gollandııanyń AZ (Alkmaar) klýbyn 2:0 esebimen jeńdi. «Tobyl» da jankúıerler seniminen tabyldy. Birinshi irikteý kezeńinde Grýzııanyń «Samtredıa» komndasyn 1:0 esepterimen jeńdi. Al ekinshi irikteý kezeńiniń alǵashqy oıynyn óz alańynda ótkizgen «Tobyl» Armenııanyń «Pıýnık» komandasyn 2:1 esebimen súrindirdi.
Qos komanda úshin de el birinshiliginde jınaqy oınaý nazardan tys qalmaıdy. Oǵan sebep bar. Jylma-jyl chempıondyq ataqqa qol jetkizý maqsatyn aldyna qoıatyn «Qaırat» bıyl altyn medal ala ma? Qazir týrnır kestesinde «Astanadan» toǵyz upaıǵa artta qalyp keledi. Árıne, elordalyq klýbtyń «Qaırattan» búginge deıin úsh oıyny artyq boldy. Ótken týrda «Qaırat» Shymkentte «Ordabasydan» 1:2 esebimen jeńilip, týrnır kestesindegi jaǵdaıyn qıyndatyp aldy. Al «Tobyl» ótken týrda óz alańynda «Ertispen» 1:1 esebimen teń oınap, nebári bir upaıdy qanaǵat tutty.
Sol sebepti qos komanda úshin de bul oıynda jeńiske jetý mańyzdy edi. Kezdesýdiń birinshi kezeńinde eki komanda tarapynan da kózge túsetindeı shabýyl bola qoıǵan joq. Kóp jaǵdaıda alań ıeleri dopqa ıelik etkenimen, odan eshbir nátıje kele qoımady. Shákirtteriniń senimsiz oıynyna shydaı almaǵan «Qaırattyń» bas bapkeri Karlos Alos Ferrer birinshi kezeń aıaqtalmaı jatyp, fýtbolshy aýystyrýǵa sheshim qabyldady. Jasyl alańǵa Andreı Arshavın shyqty. Degenmen odan da alyp bara jatqan ózgeris bola qoıǵan joq. Birinshi kezeń 0:0 esebimen teń nátıjemen máresine jetti.
Ekinshi kezeńde «Tobyl» syrt alańnan úsh upaı oljalap qaıtýǵa qarsy emestigin bildirdi. Bastapqy sátte «Qaırat» qaqpasy mańynda birneshe shabýyl uıymdastyrdy. Dese de bul sátterde olarǵa dáldik jetispeı jatty. Oıynnyń 59-mınýtynda Aderınsola Eseola ózine áýelete bergen pasty durys paıdalana almady. Al 69-mınýtta «Qaırat» sapynan Isaeel Barboza kútpegen jerden qarsylastar qaqpasyna soqqy jasap, oǵan «Tobyl» qaqpashysy Vıacheslav Kotlıar qaýqar kórsete alǵan joq. Oıynda 1:0 esebimen «Qaırat» jeńiske jetti.
Esterińizge sala ketelik, 28 sáýirde el birinshiliginde 3 oıyn bolyp ótti. Qyzylordanyń «Qaısary» óz alańynda Petropavldyń «Qyzyljaryn» 2:1, «Astana» «Atyraýdy» 2:0 esebimen jeńse, «Aqjaıyq» pen «Atyraý» komandalary 1:1 esebimen teń tarqasty.
Dál qazir Pavlodarda «Ertis» pen Qaraǵandynyń «Shahteri», Shymkentte «Ordabasy» men Taldyqorǵannyń «Jetisý» komandalary kezdesip jatyr.
Kelesi 21-týr oıyndary 4 jáne 5 tamyz kúnderi bolady. Bul týrda 4 tamyzda «Jetisý» men «Aqjaıyq», «Atyraý» men «Qaısar», «Aqtóbe» men «Astana» komandalary kezdesedi. Al 5 tamyzda «Shahter» men «Qaırat», «Tobyl» men «Ordabasy», «Qyzyljar» men «Ertis» komandalary sheberlik baıqasady.
Endi «Qaırat» ta, «Tobyl» da Eýropa lıgasy ekinshi irikteý kezeńindegi qarymta kezdesýine daıyndalady. 2 tamyzda «Qaırat» Gollandııada AZ (Alkmaar), «Tobyl» Armenııada «Pıýnıkpen» oınaıdy.
