Fýtboldan el birinshiligi: «Qaırat» Qaraǵandyda «Shahtermen» teń tústi
ASTANA. QazAqparat - Fýtboldan Premer-lıga komandalary arasyndaǵy el birinshiliginiń 21-týrynda Qaraǵandyda jergilikti «Shahter» men Almatynyń «Qaırat» komandalary arasyndaǵy kezdesý 1:1 esebimen teń aıaqtaldy, dep habarlaıdy QazAqparat tilshisi.
Qos komanda týrnır kestesinde biri aldyńǵy, ekinshisi sońǵy oryndarda keledi. Bıyl kenshiler jankúıer seniminen shyǵa almady. Kóp kezdesýde qarsylastaryna ese jiberip alyp júrgen jaıy bar. Sonyń saldarynan týrnır kestesinde sońǵy oryndardy mise tutqan. Birneshe jyl qatarynan ekinshi orynnan árige asa almaı meseli qaıtyp júrgen «Qaırat» úshin de árbir birinshiliktiń máni zor. Qazir olar týrnır kestesinde basty qarsylasy - «Astanany» birneshe upaıǵa uzatyp aldy. Degenmen osy týrda «Astana» syrt alańda «Aqtóbemen» 1:1 esebimen teń túsip, «Qaıratqa» áli de chempıondyqtan úmit úzbeıtin múmkindik jasaǵan edi.
Sol sebepti «Qaırat» Qaraǵandyǵa tek jeńis úshin keldi dep aıta alamyz. Olar beısenbide syrt alańda Gollandııanyń «AZ Alkmaar» komandasyn qos oıynnyń nátıjesinde (2:0, 0:0) orta jolda qaldyryp https://kaz.inform.kz/news/kayrat-tungysh-ret-europa-ligasynyn-ushinshi-irikteu-kezenine-shykty_a3342353, mereıi tasyp turǵan jaıy bar. Sondyqtan bas bapker Karlos Alos Ferrer alǵashqy mınýttan Stas Pokatılov, Stanıslav Lýnın, Aıbol Ábiken jáne Georgıı Jýkov syndy jigitterdi qosty. Al Andreı Arshavın, Aderıonsola Eseola syndy negizgi quramdaǵy jigitterge demalys berdi. Al komanda kapıtany Baýyrjan Islamhan alǵan jaraqatyna baılanysty Qaraǵandyǵa kelgen joq.
Dese de alań ıeleri olarǵa laıyqty tótep bere bildi. Birinshi kezeńde qos komanda shabýyl almasty. Olardyń eshqaısysy dittegen maqsatyna jete alǵan joq. Birinshi kezeńde tarazy basy teń turdy. Ekinshi kezeń oılamaǵan jerden «Qaıratqa» tosynsyı ázirlegen sekildi. «Shahter» komandasy almatylyq klýb qaqpasynan sańylaý taýyp, esep ashyp ketti. «Egon Výh oıynyń 54-mınýtynda gol saldy. Buǵan deıin alań ıeleri qaqpasynyń kiltin taba almaı júrgen «Qaırat» úshin jaǵdaı odan ári qıyndaı tústi. «Qaırattyń» ıspanııalyq bas bapkeri osydan keıin Andreı Arshavın jáne Aderıonsola Eseolany qosty. Dese de «Shahter» qorǵanys shebinde senimdi oıyn kórsete aldy. Al 92-mınýtta alań ıeleri qaqpasyna penaltı belgilendi. Ony Andreı Arshavın múltksiz oryndady. Oıyn 1:1 esebimen teń aıaqtaldy. Bul - reseılik jartylaı qorǵaýshynyń bıylǵy birinshiliktegi 8 goly.
Keshe bul týrdaǵy úsh oıyn ótkizildi. Óz alańynda Taldyqorǵannyń «Jetisýy» Oraldyń «Aqjaıyǵymen» , Aqtóbede jergilikti «Aqtóbe» elordalyq «Astanamen» 1:1 esebimen teń tússe, Atyraýda jergilikti «Atyraý» Qyzylordanyń «Qaısaryn» 2:1 esebimen tize búktirdi. Búgin Petropavlda jergilikti «Qyzyljar» Pavlodardyń «Ertisin» 1:0 esebimen basym bolsa, Qostanaıda «Tobyl» men «Ordabasy» arasyndaǵy kezdesý 1:1 esebimen teń tústi.
«Qaırat» endi Eýropa lıgasyndaǵy úshinshi irikteý kezeńine daıyndalady. Endi olar Chehııanyń «Sıgma» komandasymen sheberlik baıqasady. «Qaırat» 9 tamyzda syrt alańda, 16 tamyzda óz alańynda oınaıdy.
