Fýtboldan ekinshi lıganyń oıyndary 8 sáýirde bastalady

ASTANA. KAZINFORM — Fýtboldan ekinshi lıganyń alǵashqy týr oıyndary 8-9 sáýir kúnderi ótedi.

Bıylǵy maýsymǵa barlyǵy 20 komanda qatysady. Ol byltyrǵy jylmen salystyrǵanda tórteýge az. Komandalar bıyl da eki konferentsııaǵa bólinip, birinshi lıgaǵa beriletin joldamany sarapqa salady. 

Ońtústik-Batys konferentsııasynda «Maqtaaral» (Túrkistan oblysy), «Qaısar-J» (Qyzylorda), «Ordabasy-J» (Shymkent), «Kaspıı-J» (Aqtaý), «Jas Qyran» (Almaty), «Jaıyq» (Oral), «Jeyran» (Almaty), «Talas» (Jambyl oblysy), «Atyraý-J» jáne «Turan-J» (Túrkistan) komandalary oıyn kórsetedi.

Al soltústik-shyǵys konferentsııasynda «Jetisý-J» (Taldyqorǵan), «SD Family-J» (Astana), «Astana-J», «Tobyl-J» (Qostanaı), «Oqjetpes-J» (Kókshetaý), «Altaı-J» (Óskemen), «Elimaı-J» (Semeı), «Qyzyljar-J» (Petropavl), «Jeńis-J» (Astana) jáne «Shahter-J» (Qaraǵandy) komandalary bar.

Bıyl Qazaqstan fýtbolynda jańadan qurylǵan Almatynyń «Jeyran» jekemenshik komanda retinde erekshelenip otyr. Al «Jaıyq» talaı jyldyq tarıhy bar «Aqjaıyqtyń» ornyn basty.

Eske salsaq, fýtboldan birinshi lıga oıyndary 9 sáýirde bastalady.