Fýtboldan ChL: Bedeldi básekeniń bas júldesi qaı komandaǵa buıyrady

Atalmysh týrnırdiń tarıhy 1955/1956 jylǵy kezeńnen bastaý alady. Alǵashqyda ol Eýropa chempıondarynyń kýbogy atanǵan edi. 1992 jyldan beri qazirgi ataýymen ótkizilip keledi. «Lıverpýl» 1992 jylǵa deıin atalmysh dúbirli dodada tórt márte jeńimpaz atandy. Aldymen 1976/1977 jylǵy kezeńde Germanııanyń «Borýssııa» (Menhengladbah) komandasyn 3:1 esebimen jeńip, óz jankúıerlerin qýantty. Odan keıingi jyly da dál sol jetistigin qaıtalady. Dálirek aıtqanda, 1977/1978 jylǵy kezeńde Belgııanyń «Brıýgge» klýbyn 1:0 esebimen tize búktirip, bas báıgege ıe boldy. Kelesi kezekte mundaı tabysqa 1980/1981 jylǵy kezeńde qol jetkizdi. Sol joly Ispanııanyń «Real Madrıd» klýbynan 1:0 esebimen basym tústi. Budan keıin 1983/1984 jylǵy kezeńde Italııanyń «Roma» komandasymen kezdesti. Oıyn negizgi jáne qosymsha kezeńde 1:1 esebimen aıaqtalyp, penaltı tebýde «Lıverpýl» 4:2 esebimen basym tústi. «Lıverpýl» mundaı zor tabysqa araǵa jıyrma jyl salyp, tek 2004/2005 jylǵy kezeńde qol jetkizdi. Bul ýaqytta týrnırdiń ótkizý formaty ózgerip, ÝEFA Chempıondar lıgasy ataýyna ıe bolǵan edi. Sol fınal áli kúnge deıin jankúıerler esinde saqtalyp qaldy. Atalmysh kezdesýde birinshi kezeńnen keıin «Lıverpýl» Italııanyń «Mılan» komandasynan 0:3 esebimen jeńilip jatqan edi. Aǵylshyn jigitteri ekinshi kezeńge tas-túıin daıyndyqpen shyqty. Oıyn barysynda 3:3 esebimen tarazy basy teńesti. Penaltı tebýde aǵylshyn fýtbolshylary alǵa shyqty. Osylaısha chempıondyq ataqqa qol jetkizdi. Sondaı-aq, tarıhy Jármeńke kýbogy jáne ÝEFA kýbogynan bastaý alatyn qazirgi Eýropa lıgasy týrnırinde «Lıverpýl» úsh márte (1973, 1976, 2001) jeńimpaz atandy.

Al «Tottenhem Hotspýrs» ázirge mundaı jetistigimen maqtana almaıdy. ÝEFA Chempıondar kýbogyna áýeli 1961/1962 jylǵy kezeńde qatysty. Sol jyly jartylaı fınalǵa deıin jetti. Jartylaı fınalda qos oıynnyń nátıjesimen (1:3, 2:1) Portýgalııanyń «Benfıka» klýbyna jol berip qoıdy. Odan keıin Chempıondar lıgasynda 2010/2011, 2016/2017, 2017/2018, jylǵy kezeńde baq synady. Ázirge zor tabysqa qol jetkize qoıǵan joq. Bıyl fınalǵa deıin jetip otyr. Bálkim, óz tarıhynda tuńǵysh ret Eýropanyń bedeldi básekesinde top jaryp qalýy ábden múmkin. «Tottenhem Hotspýrs» 1972, 1984 jyldary ÝEFA kýbogy (Eýropa lıgasy) eki márte chempıon atanǵan.

ÝEFA Chempıondar lıgasynyń bıylǵy básekesinde eki komanda da jaqsy oıyn órnegin kórsetip keledi. «Lıverpýl» S tobynda synǵa túsip, ekinshi orynǵa taban tiredi . Aldyna Frantsııanyń PSJ komandasyn jiberip aldy. Bul topta Italııanyń «Napolı» jáne Serbııanyń «Tsrvena Zvezda» komandalary da oınaǵan bolatyn. Jarystyń 1/8 fınalynda «Lıverpýl» óz alańynda Germanııanyń «Bavarııa» klýbymen óz alańynda 0:0 esebimen teń túsip, syrt alańda 3:1 esebimen tize búktirdi. Shırek fınalda Portýgalııanyń «Portý» klýbyn qos kezdesýde 4:1, 2:0 esebimen jeńdi. Jartylaı fınalda olar Ispanııanyń «Barselona» klýbyna syrt alańda 0:3 esebimen ese jibergen edi. Budan keıin «Lıverpýl» jarysty jalǵastyra almaıdy degen jankúıerler sany kóp boldy. Degenmen óz alańynda olar ataqty klýbty 4:0 esebimen tas-talqan etti. Osylaısha fınalǵa beriletin joldamany qaltaǵa basty.

«Tottenhem Hotspýrs» komandasy V tobynda oınap, ekinshi oryn aldy. Aldynda - «Barselona». Jarystyń kelesi satysyna beriletin joldamaǵa olar sońǵy sátte qol jetkizdi. Italııanyń «Inter» klýby bir týr buryn aǵylshyn komandasynan úsh upaı alda turǵan edi. Sońǵy týrda eki komanda kezdesti. Anglııa klýby 1:0 esebimen basym túsip, jarystyń 1/8 fınaldyq satysyna shyqty. Bul joly Germanııanyń «Borýssııa» (Dortmýnd) komandasyn (3:0, 1:0 orta jolda qaldyrdy. Shırek fınalda óz eliniń «Manchester sıtı» klýbyn óz alańynda 1:0 esebimen jeńip, syrt alańda 3:4 esebimen jeńilip qaldy. Qos oıynnyń nátıjesimen jartylaı fınalǵa shyqqan olar Gollandııanyń «Aıaks» klýbyna óz alańynda 0:1 esebimen ese jiberip, syrt alańda 3:2 esebimen basym tústi. Aıta keterligi, olar qarymta kezdesýde birinshi keezńnen keıin 0:2 esebimen jeńilip jatqan edi. Ekinshi kezeńde qatarynan úsh gol soǵyp, bedeldi básekeniń fınalyna joldama aldy.

Eki komanda barlyq týrnırlerdi eseptegende búgin 171-shi kezdesýin ótkizedi. Buǵan deıin «Lıverpýl» 79 márte jeńis toıyn toılasa, «Tottenhem Hotspýrs» 48 márte basymdyǵyn tanytty. Qalǵan oıyndar teń nátıjemen aıaqtaldy. Aıta keterligi, bıylǵy Anglııa Premer-lıgasyndaǵy eki kezdesý de «Lıverpýl» 2:1 esebimen jeńiske jetken edi.

ÝEFA Chempıondar lıgasynda (Eýropa chempıondarynyń kýbogy) búgingi kúnge deıin Ispanııanyń «Real Madrıd» klýby 13 márte kýbokty tóbesine kótergen edi. Odan keıingi kezekte Italııanyń «Mılan» 7, Germanııanyń «Bavarııa», Anglııanyń «Lıverpýl», Ispanııanyń «Barselona» 5 márte chempıondyq tuǵyrǵa kóterildi. Jalpy alǵanda, mundaı tabysqa barlyǵy komanda qol jetkizgen.

Búgingi kezdesý Ispanııanyń Madrıd qalasyndaǵy «Metropolıtano» stadıonynda ótkiziledi. Oıyn Nur-Sultan ýaqytymen 00.50-de bastalady. Fınal Qazsport telearnasynan tikeleı efırde kórsetiledi.