Fýtboldan Chempıondar lıgasy: «Manchester Sıtı» syrt alańda jeńiske jetti
NUR-SULTAN. QazAqparat - UEFA Chempıondar lıgasynyń jartylaı fınalyndaǵy ekinshi oıyn ótkizildi, dep habarlaıdy QazAqparat tilshisi.
Bul oıynda «Parı Sen-Jermen» (Frantsııa) men «Manchester Sıtı» (Anglııa) komandalary kezdesti.
Frantsııalyq klýb alǵashqy bolyp esep ashqan edi. Ony 15-mınýtta Markınos óziniń enshisine jazdy. Birinshi kezeńde budan basqa gol soǵylǵan joq.
Ekinshi kezeńde «Manchester Sıtı» tizgindi qolǵa alýǵa tyrysty. Nátıjesinde 64-mınýtta Kevın De Breıne tarazy basyn teńestirdi. Al 71-mınýtta Rııad Marez aǵylshyndyq klýbty alǵa shyǵardy.
Osylaısha «Manchester Sıtı» qarsylasyn 2:1 esebimen basym tústi. Eki komanda arasyndaǵy qarymta kezdesý 4 mamyrda ótkiziledi.
Esterińizge sala ketelik, budan buryn «Real Madrıd» (Ispanııa) pen «Chelsı» (Anglııa) komandalary teń tústi .
UEFA Chempıondar lıgasynyń fınaly 29 mamyrda Túrkııanyń Stambýl qalasynda olımpıadalyq stadıonynda bolady.
