Fýtboldan Chempıondar lıgasy: «Lıverpýl» fınalǵa joldama aldy
NUR-SULTAN. QazAqparat - Búgin ÝEFA Chempıondar lıgasy jartylaı fınalynyń alǵashqy qarymta oıyny ótkizildi. Anglııanyń «Lıverpýl» klýby Ispanııanyń «Barselona» komandasyn qabyldady, dep habarlaıdy QazAqparat tilshisi.
Álemniń úzdik klýbtary sanalatyn qos ujym búginge deıin 10 márte sheberlik baıqasty. Onyń 4-i «Lıverpýldiń» basymdyǵymen aıaqtalsa, 3-de «Barselona» myqtylyǵyn tanytty. Qalǵan oıyndar teń nátıjemen aıaqtaldy.
Eki komanda arasyndaǵy alǵashqy kezdesýde «Barselona» 3:0 esebimen jeńgen edi. Sondyqtan «Lıverpýl» búgingi kezdesýde kem degende tarazy basyn teńestirý úshin úsh gol soǵýy tıis edi. Olar bul oılaǵanyn júzege asyra bildi.
Alǵashqy gol 7-mınýtta soǵyldy. «Lıverpýl» shabýylshysy Dıvok Orıgı mergendik tanytyp, óz komandasyn alǵa shyǵardy. Budan keıin eki komanda da gol soǵatyn múmkindikter bolǵan. Degenmen tablodaǵy esep ózgerissiz qaldy.
Oıynnyń ekinshi kezeńinde «Lıverpýl» taǵy da gol soǵyp, tarazy basyn ózine aýdaryp aldy. Aldymen 54 jáne 56-mınýttarda Jorjıno Veınaldým eki márte qarsylasynyń qaqpasyn dál kózdedi. Osylaısha qos oıynnyń nátıjesimen tarazy basy teńesti. Eki komanda da esepti ózgertýge tyrysty. Bul joly taǵy da «Lıverpýldiń» oılaǵany júzege asty. Oıynnyń 79-mınýtynda Dıvok Orıgı gol saldy.
Osylaısha búgingi kezdesýde «Lıverpýl» 4:0 esebimen jeńiske jetti. Klýb eki jyl qatarynan Chempıondar lıgasynyń fınalyna joldama aldy. Byltyr «Lıverpýl» Ispanııanyń «Real Madrıd» klýbynan 1:3 esebimen jeńilip qalǵan edi.
Chempıondar lıgasynyń taǵy bir jartylaı fınaly 8 mamyrda ótkiziledi. Gollandııanyń «Aıaks» klýby óz alańynda Anglııanyń «Tottenhem» klýbyn qabyldaıdy. Eki komanda arasyndaǵy alǵashqy kezdesýde «Aıaks» 1:0 esebimen jeńgen edi. Atalmysh kezdesý Nur-Sultan ýaqytymen 23.50-de bastalady. Oıyn «QazSport» telearnasynan tikeleı efırde kórsetiledi.
Fınal 1 maýsymda Ispanııa astanasy - Madrıd qalasynda ótkiziledi.
