Fýtboldan chempıondar lıgasy: «Qaırattyń» búgingi oıynyn qaıdan kórýge bolady
NUR-SULTAN. QazAqparat - Búgin UEFA Chempıondar lıgasy birinshi irikteý kezeńinde Almatynyń «Qaıraty» óz alańynda Izraıldiń «Makkabı» (Haıfa) komandasymen qarymta oıyn ótkizedi, dep habarlaıdy QazAqparat tilshisi.
Aıta ketsek, eki komanda 7 shildede Izraıldegi kezdesýde 1:1 esebine qanaǵat bildirdi. Búgin jeńiske jetken klýb jarysty jalǵastyrady .
«Makkabı» (Haıfa) 1913 jyly qurylǵan. Óziniń tarıhynda Izraıldiń 13 dúrkin el chempıony atanǵan.
2020/21 jylǵy maýsymda jeńimpaz tuǵyrynan kóringen olar bul jetistigin týra on jyldan keıin qaıtalap otyr.
Eske salsaq, eki komanda byltyr UEFA Eýropa lıgasy ekinshi irikteý satysynda kezdesip, ızraıldik klýb 2:1 esebimen jeńiske jetti.
Koronavırýs jaǵdaıyna baılanysty jeńimpaz bir kezdesýden aıaqtalǵan bolatyn.
Búgingi «Qaırat» pen «Makkabı» (Haıfa) arasyndaǵy kezdesý elorda ýaqytymen 19.50-de bastalyp, «Qazsport» telearnasynan tikeleı efırde kórsetiledi.
