Fýtboldan Chempıondar lıgasy: «Qaırat» syrt alańda «Makkabımen» teń tústi
NUR-SULTAN. QazAqparat - Búgin UEFA Chempıondar lıgasy birinshi irikteý kezeńinde Almatynyń «Qaıraty» syrt alańda Izraıldiń «Makkabı» (Haıfa) komandasymen kezdesti, dep habarlaıdy QazAqparat tilshisi.
Atalǵan kezdesýde almatylyq klýb fýtbolshylary oıyndy senimdi bastaǵan edi. Olardyń tarapynan gol soǵatyn birneshe múmkindik boldy. Degenmen ony shabýyl shebindegi Vagner Lav pen Hose Kante ózderiniń yńǵaıyna keltire alǵan joq. Esesine 45-mınýtta ızraıldik Omer Attsılı esep ashyp ketti.
Ekinshi kezeńde eki komanda da tablodaǵy esepti ózgertetin sátter kezdesti. Ásirese, qazaqstandyq klýbtyń belsendiligi baıqalyp turdy. Nátıjesinde 76-mınýtta Nuráli Álip tarazy basyn teńestirdi.
Kezdesýde 1:1 esebi tirkeldi. Eki komanda endi 14 shildede Almaty qalasynda qarymta oıyn ótkizedi.
Eske salsaq, «Makkabı» (Haıfa) 1913 jyly qurylǵan. Óziniń tarıhynda Izraıldiń 13 dúrkin chempıony atanǵan. 2020/21 jylǵy maýsymda jeńimpaz tuǵyrynan kóringen olar bul jetistigin týra on jyldan keıin qaıtalap otyr.
Aıta ketsek, eki komanda byltyr UEFA Eýropa lıgasy ekinshi irikteý satysynda kezdesip, ızraıldik klýb 2:1 esebimen jeńiske jetti. «Qaırat» «Makkabı» (Haıfa) klýbymen kezdesti. Koronavırýs jaǵdaıyna baılanysty jeńimpaz bir kezdesýden aıaqtalǵan bolatyn.
