Fýtboldan Chempıondar lıgasy: Ekinshi joldama kimge buıyrady
NUR-SULTAN. QazAqparat - Búgin, 5 mamyrda UEFA Chempıondar lıgasy fınalyna joldama alǵan ekinshi komanda anyqtalady, dep habarlaıdy QazAqparat tilshisi.
Bul joly «Chelsı» (Anglııa) men «Real Madrıd» (Ispanııa) komandalary kezdesedi.
Oıyn elorda ýaqytymen 00.50-de bastalyp, «Qazaqstan» jáne «Qazsport» telearnalarynan tikeleı efırde kórsetiledi.
Eki komanda quramynda jaraqat alǵan fýtbolshylar bar. «Chelsı» sapynan búgingi kezdesýde Antonıo Rıýdıger men Mateo Kovachıch oıyndy alań syrtynan tamashalaýǵa májbúr. Al «Real Madrıd» quramynda Federıko Valverde, Ferlan Mendı, Lýkas Vaskes pen Hesýs Valeho osyndaı sebeppen kezdesýden tys qalyp otyr.
Atalǵan oıynda ıtalııalyq Danıele Orsato bas qazy qyzmetin atqarady. Oǵan otandastary - Alessandro Djallatını men Fabıano Pretı kómekshilik jasaıdy. Qosalqy tóreshi de - sol eldiń ókili Davıde Massa.
Eki komanda buǵan deıin atalǵan týrnırde bir márte kezdesti. Jartylaı fınaldyń alǵashqy oıynynda komandalar 1:1 esebine qanaǵat bildirdi. Al 2016 jyly ótken Halyqaralyq chempıondar kýbogynda ıspanııalyq klýb 3:2 esebimen basym túsken edi.
Esterińizge sala ketelik, jartylaı fınaldyń taǵy bir jubynda Anglııanyń «Manchester Sıtı» klýby Frantsııanyń «Parı Sen-Jermenin» (2:0, 2:1) orta jolda qaldyryp ketti.
UEFA Chempıondar lıgasynyń fınaly 29 mamyrda Túrkııanyń Ystanbul qalasynda Olımpıadalyq stadıonda bolady.
