Fýtboldan Chempıondar lıgasy: «Bavarııa» týrnırdiń rekordyn jańartty
NUR-SULTAN. QazAqparat - 17 naýryzda UEFA Chempıondar lıgasy 1/4 fınalyna shyqqan komandalar tolyqtaı anyqtaldy, dep habarlaıdy QazAqparat tilshisi.
Cársenbide taǵy eki jup ózara kezdesti. Jeńimpazdary shırek fınalǵa joldama aldy. Mundaı múmkindikke «Chelsı» (Anglııa) men «Bavarııa» (Germanııa) klýbtary qol jetkizdi.
Alǵashqy jupta aǵylshyndyq ujym óz alańynda Ispanııanyń «Atletıko Madrıd» komandasyn qabyldady. Bul kezdesýde alań ıeleri 2:0 esebimen jeńiske jetti. «Chelsı» sapynan Hakım Zıesh – 34, Emerson 90-mınýttarda mergendik tanytty. Eki komandanyń alǵashqy oıynynda londondyq klýb syrt alańda 2:0 esebimen basym túsken bolatyn.
«Bavarııa» óz alańynda Italııanyń «Latsıo» klýbymen sheberlik baıqasty. Bul oıynda nemis fýtbolshylary qarsylasyn 2:1 esebimen tize búktirdi. Olardyń qatarynan Robert Levandovskı – 33, Erık Shýpo-Motıng 73-mınýttarda gol soqsa, 82-mınýtta Marko Parolo esep aıyrmasyn qysqartty. Atalǵan juptyń alǵashqy kezdesýinde «Bavarııa» 4:1 esebimen oısyrata jeńgen edi.
Nemis klýby óz tarıhynda 19 márte shırek fınalǵa joldama alyp otyr. Osylaısha Chempıondar lıgasy rekordyn jańartty. Budan buryn Ispanııanyń «Barselona» komandasy 18 márte shırek fınalǵa shyqqan bolatyn.
Esterińizge sala ketelik, týrnırdiń shırek fınalyna «Real Madrıd» (Ispanııa) «Manchester Sıtı» jáne «Lıverpýl» (Anglııa), «Parı Sen-Jermen» (Frantsııa), «Borýssııa Dortmýnd» (Germanııa), «Portý» (Portýgalııa) komandalary joldama aldy.
Atalǵan týrnırdiń 1/4 jáne 1/2 fınaldyq oıyndarynyń jerebesi 19 naýryzda Shveıtsarııanyń Non qalasynda ótkiziledi.
Aıta keteıik, 1/4 fınal 6-7 jáne 13-14 sáýir kúnderi bolady. Al jartylaı fınal 27-28 sáýir jáne 4-5 mamyr kúnderine belgilengen.
Fınal 29 mamyrda Túrkııanyń Stambýl qalasyndaǵy «Atatúrik» olımpıadalyq stadıonynda ótedi.
