Fýtboldan Chempıondar lıgasy: «Astananyń» qarsylasy belgili boldy
NUR-SULTAN. QazAqparat - Búgin Shveıtsarııanyń Non qalasynda fýtboldan UEFA Chempıondar lıgasy 2020/2021 jylǵy kezeńiniń birinshi irikteý satysynyń jerebesi tartyldy, dep habarlaıdy QazAqparat tilshisi.
Elordalyq «Astana» komandasyna jarystyń alǵashqy satysynda Belarýstiń «Dınamo» (Brest) komandasy qarsylas atandy. Týrnırdiń alǵashqy satysyndaǵy oıyndar 18 jáne 19 tamyz kúnderi ótkiziledi. «Astana» eýrokýboktaǵy alǵashqy kezdesýin syrt alańda bastaıdy.
Esterińizge sala ketelik, jarystyń atalǵan satysyndaǵy jeńimpaz bir ǵana oıyn arqyly anyqtalady. Jeńimpaz Chempıondar lıgasynyń ekinshi satysyna joldama alady. Jeńilgeni Eýropa lıgasynyń ekinshisi satysynda baq synaıdy.
«Astana» bizdiń elimizdiń atynan altynshy jyl qatarynan Chempıondar lıgasynyń irikteý kezeńinde synǵa túsip keledi. Máselen, 2015/2016 jylǵy kezeńde atalmysh týrnırdiń toptyq kezeńine deıin jetti. Odan keıingi úsh jylda eki márte úshinshi irikteý kezeńinen asa almasa, bir márte pleı-off kezeńine deıin bardy. Nátıjesinde olarǵa sońǵy úsh jylda Eýropa lıgasynyń irikteý kezeńine qatysýǵa múmkindik berildi. Odan súrinbeı etken elordalyqtar toptyq kezeńinde el namysyn qorǵady. Al 2016/2017 jylǵy kezeńde jarystyń 1/16 fınalyna deıin jetti.
«Dınamo» (Brest) 1960 jyly qurylǵan. Ótken jyly óz tarıhynda tuńǵysh ret Belarýs chempıony atandy. Sondaı-aq, 1992 jyly óz elinde qola júldeger boldy.
