Fýtboldan birinshi lıgada «Jetisaı» «Altaımen» teń tústi

ASTANA. KAZINFORM - Fýtboldan Birinshi lıga komandalary arasyndaǵy Qazaqstan birinshiliginiń XIІІ týry máresine jetti.

Atalǵan týrdyń ekinshi oıyn kúni, 28 maýsymda Túrkistan oblysynyń «Jetisaıy» syrt alańda Shyǵys Qazaqstan oblysynyń «Altaıymen» kezdesti. 

Bıyl birinshi lıgaǵa qosylǵan túrkistandyq komanda jaqsy oıyn órnegin kórsetip keledi. Qazirge deıin 12 kezdesýdiń 8-de jeńiske jetse, 2-de teń túsip, 2-de qarsylasyna ese jiberdi.

«Altaımen» kezdesý barysynda túrkistandyq komanda 0:0 esebine qanaǵat bildirdi.

Nátıjesinde týrnır kestesinde 26 upaımen qaıtadan birinshi orynǵa kóterildi. Aqtaýdyń «Kaspıı» komandasy da dál osyndaı upaı jınaǵan.

Sondaı-aq 28 maýsymda elordalyq «SD Family» almatylyq «Han Táńirin» 3:0 esebimen jeńse, Túrkistan oblysynyń «Arysy» óz alańynda «Ulytaýǵa» 1:4 esebimen ese jiberdi.

Aıta ketsek, atalǵan týrda 27 maýsymda Oraldyń «Aqjaıyǵy» Kókshetaýdyń «Oqjetpesine» 0:2 esebimen ese jiberse, aqtaýlyq «Kaspıı» «Túrkistandy» 2:0, «Qaırat-2» Pavlodar oblysynyń «Ekibastuzyn» 3:0, «Taraz» «Aqtóbe-2» komandasyn 2:0 esebimen jeńdi. 

Endi aldaǵy XIV týr oıyndary 4 shilde kúni ótkiziledi.