Fýtboldan birinshi lıgada «Turan» «Astana-2» komandasyn oısyrata jeńdi

Fýtboldan birinshi lıga komandalary arasynda el chempıonatynyń 26-týrynda Túrkistannyń «Turany» elordalyq «Astana-2» komandasyn oısyrata jeńdi, dep habarlaıdy Kazinform tilshisi.

Túrkistandyq klýb birneshe týr buryn Premer-lıgaǵa beriletin joldamany qaltaǵa basyp úlgerdi. Qazir týrnır kestesinde ekinshi orynda keledi. Soǵan qaramastan komanda 26-týrdaǵy oıynda «Astana-2» komandasyn 8:0 esebimen tize búktirdi.

Al Oraldyń «Aqjaıyǵy» týrnır kestesinde tórtinshi orynda tur. Olar búgin syrt alańda «Túrkistandy» 1:0 esebimen qapy qaldyrdy. Premer-lıga joldamasynan áli de úmitti. Dese de olar úshinshi oryndaǵy astanalyq «Jeńisten» bes upaıǵa qalyp tur. Qazir «Jeńiste» - 56, «Aqjaıyqta» - 51 upaı bar.

Taǵy bir kezdesýde «Ekibastuz» «Ońtústik akademııasyn» 2:1 esebimen jeńip ketti.

Endi 20 qazanda «Elimaı» men «Arys», «Han táńiri» men «Qyran», «Aqtóbe-2» men «Qaırat-2», «Taraz» ben «Jas qyran» komandalary kezdesedi.

Aıta ketsek, budan buryn fýtboldan birinshi lıgaǵa túsip qalǵan eki komanda anyqtaldy.