Fýtboldan birinshi lıgada «Shahter» men «Kaspıı» jeńisti jolyn jalǵastyrdy

ASTANA. KAZINFORM — Búgin, 22 mamyrda fýtboldan birinshi lıga komandalary arasyndaǵy Qazaqstan chempıonatynyń 7-týrynyń alǵashqy oıyn kúni ótti.

Bul kúni kósh basynda kele jatqan qaraǵandylyq «Shahter» men aqtaýlyq «Kaspıı» sátti oıyn kórsetti. Al pavlodarlyq «Ertis» teń nátıjege qanaǵat bildirdi.

Qaraǵandylyq «Shahter» syrt alańda almatylyq «Qaırat-2» klýbymen sheberlik baıqasty. Olar qaqpasyna alǵashqy bolyp gol jiberip aldy. Soǵan qaramastan oıyn barysynda oǵan eki golmen jaýap berip, qarsylasynan 2:1 esebimen basym tústi.

Al «Kaspıı» syrt alańda astanalyq «SD Family» komandasyn 3:0 esebimen súrindirse, «Ertis» (Pavlodar) pen «Akademııa Ońtústik» (Shymkent) 2:2 esebine qanaǵat bildirdi.
Atalǵan oıynnan keıin «Kaspıı» 18 upaımen kósh basynda tursa, odan keıingi oryndaǵy «Shahterdiń» 17 upaıy bar. Al «Ertis» 15 upaıdy enshilep tur.

Endi 23 mamyrda «Aqtóbe-2» (Almaty) men AKAS (Almaty), «Ekibastuz» (Pavlodar oblysy) ben «Jetisaı» (Túrkistan oblysy), «Túrkistan» men «Altaı» (Óskemen), «Han táńiri» (Almaty) men «Taraz» oınaıdy.

Týrnır kestesinde alǵashqy eki orynǵa ıe bolǵan komandalar aldaǵy jyly Premer-lıgaǵa qatysýǵa tikeleı joldamaǵa qol jetkizedi. Bıyl «Shahter», «Ertis», «Kaspıı» komandalary úzdikter qatarynda bolady dep boljanyp otyr.