Fýtboldan birinshi lıgada «Shahter» alǵashqy oıynda jeńiske jetti

ASTANA. KAZINFORM — Fýtboldan birinshi lıga komandalary arasyndaǵy Qazaqstan chempıonatynyń 1-týrynyń alǵashqy oıyn kúni ótti.

Bul kúngi matchtar shymyldyǵyn «Túrkistan» men «Shahter» (Qaraǵandy) komandalary ashty. 

Óz tarıhynda qaraǵandylyq ujym birinshi lıgada alǵash ret baq synap otyr. Otyz jyldan astam ýaqyt boıy Premer-lıgada oınap kelgen kenshiler klýb ótken jyldy sátsiz ótkizip, tómengi lıgaǵa túsip qalýǵa májbúr boldy. 

Búgingi kezdesý barysynda «Shahter» jınaqy qımyl kórsetti. Kezdesý barysynda olardyń qatarynan Dıas Qalybaev 19-mınýtta esep ashsa, túrkistandyq Ramazan Alı-Ogly 36-mınýtta tarazy basyn teńestirdi. Al 83-mınýtta «Shahter» sapynan Oljas Kerimjanov óz komandasyna jeńis alyp keldi.

Osylaısha «Shahter» qarsylasynan 2:1 esebimen basym tústi.

Bul kúni pavlodarlyq «Ertis» «Ekibastuzdy» 4:0 esebimen basym tússe, taǵy bir kezdesýde aqtaýlyq «Kaspıı» almatylyq AKAS klýbyn 3:1 esebimen jeńdi.

Endi 10 sáýirde «Ońtústik Akademııa» (Shymkent) men «Altaı» (Óskemen), «Taraz» ben «Jetisaı» (Túrkistan oblysy), «SD Family» (Astana) men «Qaırat-2» (Almaty), «Han táńiri» (Almaty) men «Aqtóbe-2» oınaıdy.