Fýtboldan birinshi lıgada «Kaspıı» jetinshi márte jeńiske jetti

ASTANA. KAZINFORM - Fýtboldan birinshi lıga komandalary arasyndaǵy Qazaqstan birinshiliginiń toǵyzynshy týrynyń alǵashqy oıyn kúni ótti.

Kósh basynda kele jatqan Aqtaýdyń «Kaspıı» komandasy bul joly da súringen joq. Syrt alańda Shymkenttiń «Qyranyn» 3:0 esebimen tize búktirdi.

Osylaısha jetinshi jeńisine qol jetkizgen «Kaspıı» týrnır kestesinde qarsylastarynan uzaı tústi.

Olardy ókshelep kele jatqan Túrkistan oblysynyń «Jetisaıy» atalǵan týrda syrt alańda Pavlodar oblysynyń «Ekibastuzyna» 1:2 esebimen jol berdi.

Óz alańynda «SD Family» óskemendik «Altaı» klýbynan 1:2 esebimen jeńilse, «Qaırat-2» «Túrkistannan» 5:1 esebimen basym tústi.

Endi atalǵan týrda 31 mamyrda «Arys» pen «Taraz», «Qaısar-2» men «Aqjaıyq», «Oqjetpes» pen «Ulytaý», «Han Táńiri» men «Aqtóbe-2» kezdesedi.

Eske salsaq, budan buryn fýtboldan Qazaqstan kýbogynda «Tobyl» men «Aqtóbe» jeńiske jetti.